മോസ്‌കോ: സിറിയയിലെ വ്യോമപ്രതിരോധം ശക്തിപ്പെടുത്താനൊരുങ്ങി റഷ്യ. യുദ്ധവിമാനത്തിന് നേരെ ആക്രമണമുണ്ടായതിന് പിന്നാലെ വിമാനാക്രമണ പ്രതിരോധത്തിനുള്ള മിസൈലുകളാണ് സിറിയയിലേക്ക് അയക്കുന്നത്. എസ്. 300 വ്യോമ പ്രതിരോധ മിസൈലുകള്‍ രണ്ട് ആഴ്ചക്കുള്ളില്‍ സിറിയയിലേക്ക് അയക്കുമെന്ന് റഷ്യന്‍ പ്രതിരോധ മന്ത്രി സെര്‍ജി ഷുഗോ പറഞ്ഞു.
എസ്. 300 സംവിധാനം ഇസ്‌റാഈലിന്റെ അഭ്യര്‍ഥന പ്രകാരം 2013ല്‍ ആണ് പിന്‍വലിച്ചത്. ഇപ്പോള്‍ സാഹചര്യങ്ങള്‍ മാറി. ഇത് ഞങ്ങളുടെ തെറ്റല്ലെന്ന് അദ്ദേഹം പറഞ്ഞു.
15 പേരുമായി പുറപ്പെട്ട റഷ്യന്‍ സൈനിക വിമാനം സെപ്റ്റംബര്‍ 17ന് ആണ് സിറിയയിലെ ലഡാകിയ പ്രദേശത്ത്‌നിന്ന് അപ്രത്യക്ഷമായത്. ഇസ്‌റാഈലിന്റെ മിസൈല്‍ ആക്രമണത്തിന് തിരിച്ചടി നല്‍കുന്നതിനിടെ സിറിയന്‍ ആക്രമണത്തില്‍ വിമാനം തകരുകയായിരുന്നുവെന്ന് പിന്നീട് കണ്ടെത്തിയിരുന്നു.