ഒറ്റപ്പാലം: സ്‌കൂള്‍ ഗെയിംസിന്റെ ഭാഗമായി ഒറ്റപ്പാലം ചുനങ്ങാട് എ.വി.എം എച്ച്.എസ്.എസില്‍ നടന്ന സംസ്ഥാനതല അണ്ടര്‍ 17 കബഡി മത്സരങ്ങളും കേരള ടീം സെലക്ഷനും സമാപിച്ചു. നോര്‍ത് സോണില്‍ ആണ്‍കുട്ടികളുടെ വിഭാഗത്തില്‍ മലപ്പുറം ജില്ലയും, പെണ്‍കുട്ടികളുടെ വിഭാഗത്തില്‍ പാലക്കാട് ജില്ലയും ചാംപ്യന്‍മാരായി. ആണ്‍കുട്ടികളുടെ മത്സരത്തില്‍ 28-24 എന്ന സ്‌കോറിന് കാസര്‍കോടിനെ തോല്‍പ്പിച്ചാണ് മലപ്പുറം ജേതാക്കളായത്. പെണ്‍കുട്ടികളുടെ മത്സരത്തില്‍ 27-29 എന്ന സ്‌കോറിന് കാസര്‍കോടിനെ തോല്‍പ്പിച്ചാണ് പാലക്കാട് ചാംപ്യന്‍മാരായത്. ആണ്‍കുട്ടികളുടെ വിഭാഗത്തില്‍ പാലക്കാടും പെണ്‍കുട്ടികളുടെ വിഭാഗത്തില്‍ തൃശൂരുമാണ് മൂന്നാംസ്ഥാനത്ത്. സൗത് സോണില്‍ കൊല്ലം ജില്ലയ്ക്ക് ഇരട്ട നേട്ടം. ആണ്‍കുട്ടികളുടെയും പെണ്‍കുട്ടികളുടെയും വിഭാഗത്തില്‍ കൊല്ലം ജില്ല ഒന്നാം സ്ഥാനം നേടി.
ആണ്‍കുട്ടികളുടെ വിഭാഗത്തില്‍ തിരുവനന്തപുരത്തെ 24-23 എന്ന സ്‌കോറിനും പെണ്‍കുട്ടികളുടെ വിഭാഗത്തില്‍ എറണാകുളത്തെ 44-14 എന്ന സ്‌കോറിനും പരാജയപ്പെടുത്തിയാണ് കൊല്ലം ജില്ല ഇരട്ടനേട്ടം കൈവരിച്ചത്. ആണ്‍കുട്ടികളുടെ വിഭാഗത്തില്‍ കോട്ടയവും പെണ്‍കുട്ടികളുടെ വിഭാഗത്തില്‍ തിരുവനന്തപുരവും മൂന്നാം സ്ഥാനക്കാരായി. ദേശീയ ചാംപ്യന്‍ഷിപ്പിനുള്ള കേരളാ ടീമിനെയും ഞായറാഴ്ച തിരഞ്ഞെടുത്തു.14 ജില്ലകളില്‍ നിന്നായി ആണ്‍കുട്ടികളുടെയും പെണ്‍കുട്ടികളുടെയും വിഭാഗങ്ങളിലായി 28 ടീമുകള്‍ മത്സരത്തില്‍ പങ്കെടുത്തിരുന്നു.