നാദാപുരം: എയര്‍പോര്‍ട്ട് റോഡില്‍ യാത്ര ദുസ്സഹമായതോടെ ഇന്നുമുതല്‍ വാഹന ഗതാഗതം നിലക്കും. നാദാപുരം-പാറക്കടവ് റോഡില്‍ അഞ്ചു കിലോമീറ്റര്‍ പരിധിയില്‍ പുനര്‍നിര്‍ണമാണത്തിനു ഫണ്ട് അനുവദിക്കുകയും മൂന്നു കിലോമീറ്റര്‍ ആധുനിക രീതിയില്‍ പരിഷ്‌കരിക്കുകയും ചെയ്തിരുന്നു.
എന്നാല്‍ റോഡിനോട് ചേര്‍ന്നു കിടക്കുന്ന ഏതാനും സ്ഥലത്തിന്റെ ഉടമകള്‍ എതിര്‍പ്പുമായി രംഗത്തുവന്നതോടെ നിര്‍മാണ പ്രവര്‍ത്തനങ്ങള്‍ സ്തംഭിക്കുകയായിരുന്നു.
ഇതേതുടര്‍ന്നു നേരത്തെ റോഡ് പ്രവൃത്തി കരാറെടുത്ത  ഊരാളുങ്കല്‍ ലേബര്‍ സൊസൈറ്റി ആവശ്യമായ വീതി ലഭിക്കാത്തതിനാല്‍ പ്രവൃത്തി ഉപേക്ഷിക്കുകയായിരുന്നു. പ്രവൃത്തി നടക്കാത്ത ഭാഗത്തു ചളിയും മണ്ണും നിറഞ്ഞു ഗതാഗതം ദുഷ്‌കരമായതോടെ പാനൂര്‍ ബസ് ഉടമകളുടെ സംഘടന ഈ റൂട്ടില്‍ ഇന്നുമുതല്‍ ബസ് സര്‍വിസ് നിര്‍ത്തിവയ്ക്കാന്‍ തീരുമാനിക്കുകയായിരുന്നു.
കഴിഞ്ഞദിവസം പെയ്ത മഴയില്‍ റോഡ് ചളിക്കുളമായിരിക്കുകയാണ്. ഇതുവഴി സര്‍വിസ് നടത്തുന്ന ടാക്‌സി വാഹനങ്ങളും സര്‍വിസ് നിര്‍ത്തിവയ്ക്കാനുള്ള ഒരുക്കത്തിലാണ്.