കാളികാവ്:  ഗ്രാമപഞ്ചായത്തില്‍ സി.പി.എം ഭരണ സമിതിക്കെതിരേ യുഡിഎഫ് അവിശ്വാസ നോട്ടിസ്  നല്‍കി. മുസ്‌ലിംലീഗും കോണ്‍ഗ്രസും ചേര്‍ന്നാണു നോട്ടിസ് നല്‍കിയത്. തെരഞ്ഞെടുപ്പില്‍ വെവ്വേറെ  മത്സരിച്ച ലീഗും കോണ്‍ഗ്രസും ഒന്നിക്കുന്നതിനു ധാരണയിലെത്തിയിട്ടുണ്ട്. ഇതോടെ ഭൂരിപക്ഷം നഷ്ടപ്പെടുന്ന സി.പി.എമ്മിനു രാജിവെക്കേണ്ടിവരും.
19  അംഗഭരണസമിതിയില്‍ സി.പി.എമ്മിന് എട്ട് അംഗങ്ങളാണുള്ളത്.  കോണ്‍ഗ്രസിന് ആറും  മുസ്‌ലീംലീഗിന് അഞ്ചും അംഗങ്ങളുള്‍പ്പെടെ യു.ഡി.എഫിന് 11 അംഗങ്ങളുമുണ്ട്. തെരഞ്ഞെടുപ്പിനു ശേഷവും യു.ഡി.എഫ്. സംവിധാനത്തിനെക്കുറിച്ചു ചര്‍ച്ച നടത്തിയിരുന്നു. പ്രസിഡന്റ് പദവി വീതം  വെക്കുന്നതിനെച്ചൊല്ലിയുണ്ടായ തര്‍ക്കത്തെത്തുടര്‍ന്നു ധാരണയിലെത്താനായിരുന്നില്ല.
മുസ്‌ലീംലീഗിന്റെ ആവശ്യങ്ങള്‍ അംഗീകരിക്കാന്‍ കോണ്‍ഗ്രസ് നേതൃത്വം തയ്യാറായതോടെയാണു മുന്നണിയാകുന്നത്. ഭരണ സമിതിയുടെ നാലരവര്‍ഷത്തില്‍ ആദ്യത്തെ ഒരു വര്‍ഷം മുസ്‌ലീംലീഗിനു പ്രസിഡന്റ്  പദവി നല്‍കണം. പിന്നീട് കോണ്‍ഗ്രസ് നിശ്ചയിക്കുന്നവര്‍ ഭരിച്ച ശേഷം പ്രസിഡന്റ് പദവി  ഒഴിഞ്ഞു ലീഗിനു വീണ്ടും നല്‍കണമെന്നുമാണു ധാരണ.
       യു.ഡി.എഫ് ഒന്നിക്കുന്നതില്‍  യോജിപ്പില്ലാത്ത ഒരു വിഭാഗം യു.ഡി.എഫ് സേവ് ഫോറം എന്ന പേരില്‍ വ്യാജ  നോട്ടിസിറക്കിയെങ്കിലും ഇരു പാര്‍ട്ടിയിലേയും നേതാക്കള്‍ ഒന്നിക്കാനുള്ള തീരുമാനത്തില്‍ ഉറച്ചുനില്‍ക്കുകയായിരുന്നു. പഞ്ചായത്തില്‍ യുഡിഎഫ് വിരുദ്ധ സമീപനം ആരു സ്വീകരിച്ചാലും അവര്‍ക്കെതിരേ   ശക്തമായ നടപടിയുണ്ടാകുമെന്നാണ് ഇരു പാര്‍ട്ടിയുടെയും നേതൃത്വം പറയുന്നത്. കാളികാവ്  ഗ്രാമപഞ്ചായത്തിലെ ഭരണ പ്രതിസന്ധി പരിഹരിക്കാനാണു ഭരണസമിതിക്കെതിരേ അവിശ്വാസത്തിന് നോട്ടിസ്  നല്‍കിയതെന്നും നേതൃത്വം പറഞ്ഞു.
വ്യാഴാഴ്ചയാണ് കാളികാവ് ബ്ലോക്ക് പഞ്ചായത്ത്  സെക്രട്ടറി ബൈജു പോളിനു നോട്ടിസ് കൈമാറിയത്. പ്രസിഡന്റ് നീലേങ്ങാടന്‍  സൈതാലിക്കെതിതിരേ കോണ്‍ഗ്രസിലെ കെ. നജീബ് ബാബു കൊണ്ടുവന്ന നോട്ടിസ് ലീഗിലെ വി.പി.എ  നാസര്‍ പിന്താങ്ങി. വൈസ് പ്രസിഡന്റ് കൗലത്തിനെതിരേ പി.ടി.ഹാരിസ് തല്‍കിയ നോട്ടീസില്‍  കോണ്‍ഗ്രസ് അംഗം മന്‍സൂര്‍ പിന്താങ്ങി. മുസ്‌ലീംലീഗിലെ വി.പി.എ നാസര്‍ ആദ്യതവണ  പ്രസിഡന്റാകുമെന്നാണു സൂചന.