കരുളായി: മൂത്തേടം പഞ്ചായത്തില്‍ കാട്ടാനയുടെ ആക്രമണം ഒഴിയുന്നില്ല. കഴിഞ്ഞ ഒരാഴ്ച മുന്‍പാണ് പഞ്ചായത്തിന്റെ വിവിധ ഭാഗങ്ങളില്‍ ഒറ്റക്കൊമ്പന്‍ ദിവസങ്ങളോളം ആക്രമണം അഴിച്ചു വിട്ടത്.
വനം വകുപ്പ് വനാതിര്‍ത്തിയില്‍ നിര്‍മിച്ച കരിങ്കല്‍ ഭിത്തി തകര്‍ത്തായിരുന്നു ആന കൃഷിയിടത്തിലും ജനവാസമേഖലയിലും എത്തിയത്. ഇതേത്തുടര്‍ന്ന് പി.വി അന്‍വര്‍ എംഎല്‍എ സ്ഥലം സന്ദര്‍ശിക്കുകയും ദ്രുതകര്‍മസേനയെയും താല്‍ക്കാലിക വാച്ചര്‍മാരെയും നിയമിക്കുകയും ചെയ്തിരുന്നു.
കൂടാതെ കരിങ്കല്‍ ഭിത്തി തകര്‍ക്കാതിരിക്കാന്‍ ഭിത്തിക്ക് മുകളില്‍ കഴിഞ്ഞ ദിവസം വനം വകുപ്പ് പവര്‍ ഫെന്‍സിംഗ് സ്ഥാപിച്ചിരുന്നു. ഈ വേലി തകര്‍ത്താണ് ഒറ്റ കൊമ്പന്‍ വീ@ണ്ടും ജന വാസമേഖലയിലേക്ക് കയറാന്‍ ശ്രമിച്ചത്. എന്നാല്‍ കാവല്‍ക്കാര്‍ എത്തി ആനയെ പിന്തിരിപ്പിക്കുകയായിരുന്നു. നിരന്തരം എത്തുന്ന ആനയെ ഉള്‍ക്കാട്ടിലേക്ക് കയറ്റി വിടാന്‍ അധികൃതര്‍ തയാറാവണമെന്ന് കര്‍ഷകര്‍ പറഞ്ഞു.