കൊട്ടാരക്കര: വിലയ്ക്കും പുണ്യം നല്‍കുന്നവരാണെന്ന ധാരണ പൂജാരി മുതല്‍ തൂപ്പുകാര്‍ വരെയുള്ളവര്‍ മാറ്റണമെന്ന് ദേവസ്വംബോര്‍ഡ് പ്രസിഡന്റ് പ്രയാര്‍ ഗോപാലകൃഷ്ണന്‍ പറഞ്ഞു. കൊട്ടാരക്കരയില്‍ തിരുവിതാംകൂര്‍ ദേവസ്വം എംപ്ലോയീസ് യൂണിയന്‍ സംസ്ഥാന സമ്മേളനത്തില്‍ സ്വീകരണം ഏറ്റുവാങ്ങി സംസാരിക്കുകയായിരുന്നു അദ്ദേഹം. ഭക്തരോടുള്ള സഹകരണം മാതൃകാപരമാകണം. അന്യാധീനപ്പെട്ട ദേവസ്വം ഭൂമി തിരിച്ചെടുക്കാനുള്ള പരിശ്രമങ്ങള്‍ ദേവസ്വംബോര്‍ഡ് നടത്തും. ചെറുവള്ളി എസ്‌റ്റേറ്റില്‍ മാത്രം നൂറേക്കറോളം ഭൂമി ദേവസ്വം ബോര്‍ഡിന്റേതാണ്. എരുമേലിയില്‍ 132 ഏക്കറുണ്ടായിരുന്ന ദേവസ്വംഭൂമി ഇപ്പോള്‍ 16 ഏക്കര്‍ മാത്രമാണുള്ളത്. അന്യാധീനപ്പെട്ട ഭൂമി തിരിച്ചുപിടിക്കുകയും എയിഡഡ് സര്‍വകലാശാലയും മെഡിക്കല്‍ കോളജും തുടങ്ങാനുള്ള പദ്ധതികളും ദേവസ്വംബോര്‍ഡിനുണ്ടെന്ന് അദ്ദേഹം പറഞ്ഞു.
പ്രതിനിധി സമ്മേളനം ആര്‍.എസ്.പി സംസ്ഥാന സെക്രട്ടറി എ.എ അസീസ് ഉദ്ഘാടനം ചെയ്തു. യൂനിയന്‍ സംസ്ഥാന പ്രസിഡന്റ് കെ.പി മധുസൂദനന്‍പിള്ള അധ്യക്ഷനായി. വര്‍ക്കിങ് പ്രസിഡന്റ് ചവറ രാജശേഖരന്‍, പ്രേംജിത്ത് ശര്‍മ്മ, കെ.പി ഉണ്ണികൃഷ്ണന്‍, പി.എസ് പ്രസാദ്, പ്രശാന്തന്‍പിള്ള, വര്‍ക്കല ശശികുമാര്‍, മാവേലിക്കര ആര്‍ ഗോപകുമാര്‍ തുടങ്ങിയവര്‍ സംസാരിച്ചു.