ന്യൂഡല്‍ഹി: ഡല്‍ഹി കലാപവുമായി ബന്ധപ്പെട്ട് ഗൂഢാലോചന കുറ്റം ചുമത്തി അറസ്റ്റ് ചെയ്ത സിം വില്‍പനക്കാരന്റെ ജാമ്യം റദ്ദാക്കണമെന്നാവശ്യപ്പെട്ട് പൊലിസ് നല്‍കിയ ഹരജി സുപ്രിംകോടതി തള്ളി.
ജഡ്ജിമാരായ അശോക് ഭൂഷണ്‍, ആര്‍. സുഭാഷ് റെഡ്ഡി, എം.ആര്‍ ഷാ എന്നിവരടങ്ങിയ ബെഞ്ചിന്റെതാണ് നടപടി. കലാപത്തിന് ഗൂഢാലോചന നടത്തിയെന്നാരോപിച്ച് രാജ്യതലസ്ഥാന നഗരിയില്‍ സിം ഉള്‍പ്പെടെയുള്ളവ വില്‍പന നടത്തിയിരുന്ന ഫൈസാന്‍ ഖാന് ആണ് സുപ്രിംകോടതി ആശ്വാസം നല്‍കിയത്. കഴിഞ്ഞമാസം 23ന് ഫൈസാന് ഡല്‍ഹി ഹൈക്കോടതി ജാമ്യം നല്‍കിയിരുന്നു. ഈ വിധി ചോദ്യം ചെയ്താണ് ഡല്‍ഹി പൊലിസ് സുപ്രിംകോടതിയില്‍ ഹരജി നല്‍കിയത്. സിം വില്‍പനക്കാരനായ ഫൈസാന്‍ ഖാന്‍ ആവശ്യമായ തിരിച്ചറിയല്‍ രേഖകള്‍ പരിശോധിക്കാതെ പല വിദ്യാര്‍ഥികള്‍ക്കും സിം കാര്‍ഡ് വിതരണം ചെയ്‌തെന്നാരോപിച്ചാണ് പൊലിസ് അറസ്റ്റ് ചെയ്തത്. എന്നാല്‍ പൗരത്വ ഭേദഗതി നിയമത്തിനെതിരായ പ്രതിഷേധങ്ങളില്‍ ഫൈസാന് നേരിട്ട് പങ്കുണ്ടെന്ന് തെളിയിക്കാന്‍ മതിയായ തെളിവുകള്‍ പൊലിസിന് ഹാജരാക്കാനായില്ലെന്ന് ചൂണ്ടിക്കാട്ടിയാണ് ഹൈക്കോടതി ജാമ്യം അനുവദിച്ചത്. താന്‍ വില്‍പന നടത്തിയ സിം കാര്‍ഡുകള്‍ പ്രതിഷേധം സംഘടിപ്പിക്കാന്‍ വേണ്ടി ഉപയോഗിക്കപ്പെടുമെന്ന് ഫൈസാന് കൃത്യമായി അറിയാമായിരുന്നുവെന്ന് അന്വേഷണ സംഘത്തിന് തെളിയിക്കാന്‍ സാധിച്ചാല്‍ മാത്രമേ യു.എ.പി.എ ചുമത്താനാകൂവെന്നും ഹൈക്കോടതി പറഞ്ഞിരുന്നു.ഇതേ കേസില്‍ അറസ്റ്റിലായ ആക്ടിവിസ്റ്റ് ദേവാംഗണ കലിതയ്ക്ക് ജാമ്യം നല്‍കിയ ഡല്‍ഹി ഹൈക്കോടതി വിധി ചോദ്യം ചെയ്ത് പൊലിസ് സമര്‍പ്പിച്ച ഹരജിയും കഴിഞ്ഞ മാസം സുപ്രിംകോടതിയുടെ ഇതേ ബെഞ്ച് തള്ളിയിരുന്നു. കലിത സ്വാധീനമുള്ള വ്യക്തിയാണെന്നും അവര്‍ തെളിവുകള്‍ നശിപ്പിക്കുമെന്നും ഡല്‍ഹി പൊലിസ് വാദിച്ചെങ്കിലും, അവര്‍ എങ്ങനെ തെളിവ് നശിപ്പിക്കുമെന്ന മറുചോദ്യം ഉന്നയിച്ചുകൊണ്ടാണ് അന്ന് ഹരജി സുപ്രിംകോടതി തള്ളിയത്.