ലണ്ടന്‍: വിന്‍ഡീസിനെതിരേയുള്ള നിര്‍ണായക മത്സരത്തില്‍ ശ്രീലങ്കക്ക് ജയം. 23 റണ്‍സിനാണ് ലങ്ക വിന്‍ഡീസിനെ കീഴക്കിയത്. ആദ്യം ബാറ്റ് ചെയ്ത ലങ്കയ്ക്ക് മികച്ച സ്‌കോര്‍ കണ്ടെത്തിയതാണ് വഴിത്തിരിവായത്.

ഈ ലോകകപ്പില്‍ ആദ്യമായി ലങ്കന്‍ ബാറ്റ്‌സ്മാന്‍മാര്‍ മികവിലേക്കുയര്‍ന്നപ്പോള്‍ ലങ്കന്‍ സ്‌കോര്‍ 50 ഓവറില്‍ ആറിന് 338 എന്ന നിലയിലെത്തി. മറുപടി ബാറ്റിങ്ങിനിറങ്ങിയ വിന്‍ഡീസിന് 9 വിക്കറ്റ് നഷ്ടത്തില്‍ 315 റണ്‍സെടുക്കാനെ കഴിഞ്ഞുള്ളൂ. സെമിഫൈനല്‍ സാധ്യതകള്‍ നിലനിര്‍ത്താന്‍ മികച്ച മാര്‍ജിനില്‍ ജയിക്കണമെന്നത് അനിവാര്യമായ മത്സരത്തില്‍ അതിനൊത്ത പ്രകടനമാണ് ലങ്കന്‍ ബാറ്റിങ് നിര പുറത്തെടുത്തത്. ആദ്യ വിക്കറ്റില്‍ ക്യാപ്റ്റന്‍ ദിമുത് കരുണാരത്‌നയും കുശാല്‍ പെരേരയും ചേര്‍ത്തത് 93 റണ്‍സ്. 32 റണ്‍സുമായി കരുണാരത്‌നയും 64 റണ്‍സുമായി പെരേരയും മടങ്ങിയെങ്കിലും പിന്നീടുവന്ന അവിഷ്‌കാ ഫെര്‍നാണ്ടോ പൊരുതാനുറച്ചു തന്നെയായിരുന്നു. നാലാം വിക്കറ്റില്‍ കുശാല്‍ മെന്‍ഡിസുമായി 85 റണ്‍സും അഞ്ചാം വിക്കറ്റില്‍ എയ്ഞ്ചലോ മാത്യൂസുമൊത്ത് 58 റണ്‍സും കൂട്ടിച്ചേര്‍ത്ത് ഫെര്‍നാണ്ടോ മടങ്ങുമ്പോള്‍ ലങ്കന്‍ സ്‌കോര്‍ 300 കടന്നിരുന്നു.

ഇതിനിടയില്‍ ഏകദിന കരിയറിലെ തന്റെ ആദ്യ സെഞ്ചുറിയും ഈ ലോകകപ്പിലെ ഒരു ശ്രീലങ്കന്‍ താരത്തിന്റെ ഏക സെഞ്ചുറിയും ഫെര്‍നാണ്ടോ തന്റെ പേരിലാക്കി.

104 റണ്‍സ് നേടിയ ഫെര്‍നാണ്ടോ കോട്രെല്ലിന്റെ പന്തില്‍ പുറത്താകുകയായിരുന്നു. വിന്‍ഡീസിനു വേണ്ടി ജേസണ്‍ ഹോള്‍ഡര്‍ രണ്ടു വിക്കറ്റുകള്‍ നേടി. ടോസ് നേടിയ വിന്‍ഡീസ് ഫീല്‍ഡിങ് തിരഞ്ഞെടുക്കുകയായിരുന്നു.