പൂനെ: ഫുട്‌ബോള്‍ പോലെയല്ല, ക്രിക്കറ്റ് ക്യാപ്റ്റന്റെ ഗെയിമാണെന്നും പരിശീലകന്‍ പിന്നിലേക്ക് മാറിനില്‍ക്കണമെന്നും മുന്‍ ഇന്ത്യന്‍ സ്‌കിപ്പര്‍ സൗരവ് ഗാംഗുലി.

'എ സെഞ്ചുറി ഈസ് നോട്ട് ഇനഫ്' എന്ന തന്റെ പുസ്തക പ്രകാശന ചടങ്ങില്‍ സംസാരിക്കുകയായിരുന്നു ഗാംഗുലി. സിംബിയോസിസ് ഇന്റര്‍നാഷണല്‍ ഡീംഡ് യൂനിവേഴ്‌സിറ്റിയിലായിരുന്നു ചടങ്ങ്. മുതിര്‍ന്ന കളിയെഴുത്തുകാരന്‍ ഗൗതം ഭട്ടാചാര്യയുമൊത്താണ് ഗാംഗുലി പുസ്തകമെഴുതിയത്.

ശേഷം ഗൗതം ഭട്ടാചാര്യയുമായി ഗാംഗുലി പാനല്‍ ചര്‍ച്ച നടത്തി.

''ഇത് ഫുട്‌ബോള്‍ പോലയെല്ല. ഇപ്പോള്‍ കുറേ ക്രിക്കറ്റ് പരിശീലകര്‍ ഫുട്‌ബോളിലെന്ന പോലെ കളി നിയന്ത്രിക്കാന്‍ ഇറങ്ങുന്നു. പക്ഷെ, ക്രിക്കറ്റ് ക്യാപ്റ്റന്റെ കളിയാണ്. കോച്ച് പിന്നിലെ സീറ്റില്‍ ഇരിക്കണം, അതാണ് പ്രധാനം''- ഇന്ത്യ കണ്ട മികച്ച ക്യാപ്റ്റന്മാരില്‍ ഒരാളായ 46 കാരന്‍ ഗാംഗുലി പറഞ്ഞു.

എന്നാല്‍ കോച്ചിന് ഉണ്ടാവേണ്ട ഗുണത്തെപ്പറ്റി ചോദിച്ചപ്പോള്‍, 'മാന്‍ മാനേജ്‌മെന്റ്' ആണ് എന്ന് അദ്ദേഹം പ്രതികരിച്ചു.

കരിയറില്‍ ലഭിച്ച ഏറ്റവും നല്ല ഉപദേശം എന്തായിരുന്നുവെന്ന് ചോദിച്ചപ്പോള്‍, 'ഒരിക്കലും കോച്ചിനെ എടുക്കരുത്' എന്നായിരുന്നു പ്രതികരണം.