മഞ്ചേശ്വരം: കുഞ്ചത്തൂരില്‍ നിയന്ത്രം വിട്ട് ബസ് മറിഞ്ഞു. ഡ്രൈവറടക്കം 17 പേര്‍ക്ക് പരുക്ക്. പാലക്കാട്ടുനിന്ന് വിനോദയാത്ര പോവുകയായിരുന്ന വിദ്യാര്‍ഥിനികള്‍ സഞ്ചരിച്ച ബസാണ് അപകടത്തില്‍ പെട്ടത്. ഇന്നലെ പുലര്‍ച്ചെ നാലരയോടെ കുഞ്ചത്തൂര്‍ പഴയ ആര്‍.ടി.ഒ. ഓഫിസിന് സമീപമാണ് അപകടം. ഷൊര്‍ണൂരിലെ സ്വകാര്യ കോളജിലെ വിദ്യാര്‍ഥിനികളുമായി മൈസൂരുവിലേക്ക് വിനോദയാത്ര പോവുകയായിരുന്ന ബസാണ് അപകടത്തില്‍ പെട്ടത്.
അറുപതോളം വിദ്യാര്‍ഥിനികളാണ് ബസിലുണ്ടായിരുന്നത്. ഇന്നലെ പുലര്‍ച്ചെയുണ്ടായ മഴ മൂലം നനഞ്ഞ റോഡില്‍നിന്ന് തെന്നി മറിയുകയായിരുന്നുവെന്നാണ് ഡ്രൈവറുടെ മൊഴി.
ഡ്രൈവര്‍ പാലക്കാട് നെന്മാറയിലെ സുനില്‍ (28) അടക്കം 17 പേരും ഉപ്പളയിലെ സ്വകാര്യ ആശുപത്രിയില്‍ ചികിത്സ തേടി. അപകടത്തില്‍ പെട്ടവരുടെ പരുക്ക് സാരമുള്ളതല്ലെന്ന് ആശുപത്രി അധികൃതര്‍ അറിയിച്ചു.