കോട്ടായി: കോട്ടായിയിലെ അപ്ലൈഡ് സയന്‍സ് കോളജിന് വര്‍ഷങ്ങളായി സ്വന്തം കെട്ടിടമില്ല. കോട്ടായി ഐ.എച്ച്.ആര്‍.ഡി കോളജ് ഓഫ് അപ്ലൈഡ് സയന്‍സിനു സ്വന്തം കെട്ടിടം നിര്‍മിക്കാന്‍ നടപടിയെടുക്കണമെന്നാവശ്യം ശക്തമാകുന്നു. വര്‍ഷങ്ങളായി നിലവില്‍ പഞ്ചായത്ത് കല്യാണമണ്ഡപത്തിലാണ് കോളജ് പ്രവര്‍ത്തിക്കുന്നത്.
പഞ്ചായത്ത് അനുവദിച്ച 30 സെന്റില്‍ ഒരു നില കെട്ടിടം നിര്‍മിക്കാന്‍ മണ്ണ് പരിശോധന പൂര്‍ത്തിയാക്കിയെങ്കിലും തുടര്‍നടപടികള്‍ ഇതുവരെ ഉണ്ടായില്ല. രണ്ട് വര്‍ഷം മുന്‍പ് കഴിഞ്ഞ സര്‍ക്കാരിന്റെ കാലത്ത് അന്നത്തെ വിദ്യാഭ്യാസ മന്ത്രി കോളജിനു സ്വന്തം കെട്ടിടം നിര്‍മിക്കാന്‍ നടപടികള്‍ സ്വീകരിക്കുമെന്ന് എ.കെ. ബാലന്‍ എം.എല്‍.എയുടെ സബ്മിഷനു മറുപടി നല്‍കിയെങ്കിലും കാര്യങ്ങള്‍ എത്തിയില്ല.
പഞ്ചായത്ത് കല്യാണമണ്ഡപം, ചെംമ്പൈ സ്മാരക വിശ്രമകേന്ദ്രം, സാംസ്‌കാരിക നിലയം എന്നിവിടങ്ങളിലാണ് ഇപ്പോള്‍ കോളേജ് പ്രവര്‍ത്തിക്കുന്നത്. പ്രധാന ക്ലാസുകള്‍ മണ്ഡപത്തിലും ഓഫിസും മറ്റും ഇരുനൂറ്റി അന്‍പതോളം മീറ്റര്‍ അകലെയുള്ള വിശ്രമകേന്ദ്രത്തിലുമാണ് പ്രവര്‍ത്തിക്കുന്നത്.
ഇതുമൂലം കല്യാണമണ്ഡപം നാട്ടുകാരുടെ ആവശ്യത്തിനു ലഭിക്കുന്നില്ലെന്നും പരാതിയുണ്ട്. അമിത വാടക കൊടുത്ത് സ്വകാര്യ മണ്ഡപങ്ങളാണ് കല്യാണ ആവശ്യത്തിനും മറ്റും ഉപയോഗിക്കുന്നത്.
ഇവിടെ കോളജ് പ്രവര്‍ത്തനം ആരംഭിച്ചിട്ട് എട്ടു വര്‍ഷം പിന്നിടുമ്പോഴും മാറിമാറി വരുന്ന സംസ്ഥാന സര്‍ക്കാരുകളുടെ അവഗണനമൂലം ഇപ്പോഴും കോട്ടായി അപ്ലൈഡ് സയന്‍സ് കോളജിന് സ്വന്തം കെട്ടിടമെന്നത് സ്വപ്നം മാത്രമാകുന്നു.