തിരുവനന്തപുരം: തെരഞ്ഞെടുപ്പുകള്‍ അടുത്തതോടെ പ്രതിപക്ഷനേതാവ് വിഭ്രാന്തിയുടെ അവസ്ഥയിലാണെന്ന് മന്ത്രി ടി.എം തോമസ് ഐസക്.
അതുമൂലമുള്ള ജല്‍പനങ്ങളാണ് ദിവസവും പുറത്തുവരുന്നതെന്നും നാടിനെക്കുറിച്ച് അദ്ദേഹത്തിന് കാഴ്ചപ്പാടില്ലെന്നും കേസരി സ്മാരക ട്രസ്റ്റിന്റെ മുഖാമുഖം പരിപാടിയില്‍ മന്ത്രി പ്രതികരിച്ചു.
തദ്ദേശ സ്വയംഭരണ സ്ഥാപനങ്ങളുടെ ഓഡിറ്റിങ്ങുമായി ബന്ധപ്പെട്ട പ്രതിപക്ഷനേതാവിന്റെ സമീപനവും ഇതേ നിലയിലായിരുന്നു.
അതാണ് ഹൈക്കോടതി തള്ളിയത്. സോഫ്റ്റ്‌വെയറില്‍ കേന്ദ്രസര്‍ക്കാര്‍ കൊണ്ടുവന്ന മാറ്റങ്ങള്‍ ഉള്‍ച്ചേര്‍ക്കുന്നതിന്റെ സാങ്കേതികമായ നടപടിക്രമങ്ങള്‍ പൂര്‍ത്തിയാക്കിയതിനു ശേഷം 2019- 20ലെ ഓഡിറ്റ് ആരംഭിക്കാമെന്ന സര്‍ക്കാര്‍ നിര്‍ദേശത്തെ അഴിമതി മറച്ചുവയ്ക്കാനുള്ള കുതന്ത്രമായാണ് പ്രതിപക്ഷനേതാവ് ചിത്രീകരിച്ചത്. സാധ്യമായ എല്ലാ രേഖകളും സഹിതം പല മാര്‍ഗത്തില്‍ വസ്തുത ബോധ്യപ്പെടുത്താന്‍ ശ്രമിച്ചിട്ടും അദ്ദേഹം തൃപ്തനായില്ല. ഹൈക്കോടതിയുടെ തീര്‍പ്പും അദ്ദേഹത്തിന് ബോധ്യപ്പെടുമോയെന്ന് കണ്ടറിയണം.
തനിക്ക് വിദേശത്ത് നിക്ഷേപമുണ്ടെന്ന ബി.ജെ.പി സംസ്ഥാന പ്രസിഡന്റിന്റെ ആക്ഷേപം ഏത് കേന്ദ്ര ഏജന്‍സിയെ വച്ചും അന്വേഷിക്കാം.
വെറുതെ അപവാദം പറഞ്ഞുനടക്കുന്നത് കെ. സുരേന്ദ്രന്‍ ശീലമാക്കുകയാണ്. സമൂഹമാധ്യമങ്ങളില്‍ നാഥനില്ലാതെ വരുന്ന വാര്‍ത്തകള്‍ക്കു പിന്നിലുള്ള ജനുസുകള്‍ക്കൊപ്പമേ സുരേന്ദ്രനെയും കാണാനാകൂ. അത്തരം ആക്ഷേപങ്ങള്‍ക്ക് മറുപടി പറയാന്‍ താന്‍ ആളല്ലെന്നും ഐസക് പറഞ്ഞു.