മുംബൈ: രണ്ടുലക്ഷം രൂപയോ, അതിലധികമോ ഇടപാടില്‍നിന്നോ, വ്യക്തിയില്‍നിന്നോ പണമായി സ്വീകരിച്ചാല്‍ ഇനി പിഴ അടയ്‌ക്കേണ്ടിവരും.
ആദായ നികുതി വകുപ്പ് നിയമത്തിലെ സെക്ഷന്‍ 269 എസ്.ടി പ്രകാരമാണ് നടപടി. രണ്ടുലക്ഷമോ, അതിന് മുകളിലോ ഉള്ള തുക ചെക്ക്, ഡ്രാഫ്റ്റ്, ഇലക്ട്രോണിക് ക്ലിയറിങ് സംവിധാനം (ഇ.സി.എസ്) മുഖേനയേ ഇടപാട് നടത്താന്‍ പറ്റൂ.
ക്രെഡിറ്റ് കാര്‍ഡ്, ഡെബിറ്റ് കാര്‍ഡ്, നെറ്റ് ബാങ്കിങ്, ഐ.എം.പി.എസ് (ഉടനടി പേയ്‌മെന്റ് സേവനം), യു.പി.ഐ (ഏകീകൃത പേയ്‌മെന്റ് ഇന്റര്‍ഫേസ്), ആര്‍.ടി.ജി.എസ്, എന്‍.ഇ.എഫ്.ടി (നാഷനല്‍ ഇലക്ട്രോണിക് ഫണ്ട് ട്രാന്‍സ്ഫര്‍), ഭീം (ഭാരത് ഇന്റര്‍ഫേസ് ഫോര്‍ മണി), ആധാര്‍ പേ തുടങ്ങിയവ മുഖേനയുള്ള പണമിടപാടുകളാണ് ഇ.സി.എസ് ആയി പരിഗണിക്കുന്നത്. അതേസമയം, ഇടപാടിന് മതിയായ കാരണങ്ങളുണ്ടെന്ന് തെളിയിക്കാനായാല്‍ പിഴ ഈടാക്കില്ലെന്നും സെക്ഷന്‍ 269 എസ്.ടിയില്‍ വ്യക്തമാക്കുന്നുണ്ട്.