തേഞ്ഞിപ്പലം: 'വിശ്വ ശാന്തിക്ക് മതവിദ്യ' എന്ന പ്രമേയത്തില്‍ ഡിസംബര്‍ 27, 28, 29 തിയതികളില്‍ കൊല്ലത്ത് വച്ച് നടക്കുന്ന സമസ്ത കേരള ജംഇയ്യത്തുല്‍ മുഅല്ലിമീന്‍ അറുപതാം വാര്‍ഷിക മഹാ സമ്മേളനത്തിന് ഒരുക്കങ്ങളായി. അറുപത് ഇന കര്‍മപദ്ധതികളോടെ 2018 ഫെബ്രുവരിയില്‍ പ്രഖ്യാപിച്ച വാര്‍ഷികാഘോഷമാണ് ലക്ഷങ്ങള്‍ പങ്കെടുക്കുന്ന ബഹുജന സമ്മേളനത്തോടെ സമാപിക്കുന്നത്.
സമ്മേളന പ്രമേയ പ്രഭാഷകര്‍ക്കുള്ള കോച്ചിങ് ക്ലാസ്, മുഅല്ലിം അദാലത്ത്, പെന്‍ഷനേഴ്‌സ് സംഗമം, റെയ്ഞ്ച്-ജില്ലാതല സ്വാഗതസംഘ രൂപീകരണം, തീസിസ് മത്സരം, കലാ- സാഹിത്യ മത്സരം, ഇന്‍തിബാഹ്, മുഅല്ലിം പ്രബന്ധ മത്സരം, കിഫായ കര്‍മസേവകരെ തയാറാക്കല്‍ തുടങ്ങിയ പദ്ധതികള്‍ ഇതിനോടകം നടന്നുകഴിഞ്ഞു.സമ്മേളനത്തിന്റെ ഭാഗമായി ഈ മാസം 31ന് കൊല്ലത്ത് തെക്കന്‍ മേഖല കണ്‍വന്‍ഷനും സ്വാഗതസംഘം രൂപീകരണ യോഗവും നടക്കും.
വൈസ് പ്രസിഡന്റ് പുറങ്ങ് മൊയ്തീന്‍ മുസ്‌ലിയാരുടെ അധ്യക്ഷതയില്‍ ചേര്‍ന്ന എസ്.കെ.ജെ.എം.സി.സി നിര്‍വാഹക സമിതി സമ്മേളന ഒരുക്കങ്ങള്‍ അവലോകനം ചെയ്തു. എം.എം മുഹ്‌യിദ്ദീന്‍ മുസ്‌ലിയാര്‍ ആലുവ പ്രാര്‍ഥന നടത്തി. വാക്കോട് മൊയ്തീന്‍കുട്ടി ഫൈസി ഉദ്ഘാടനം ചെയ്തു. ഹജ്ജിന് പോകുന്ന കൗണ്‍സില്‍ അംഗങ്ങളായ അബ്ദുല്ല മാസ്റ്റര്‍ കൊട്ടപ്പുറം, അബ്ദുസ്സമദ് മുട്ടം എന്നിവര്‍ക്ക് യാത്രയയപ്പ് നല്‍കി.
എം.എം ഇമ്പിച്ചിക്കോയ മുസ്‌ലിയാര്‍ വയനാട്, വാക്കോട് മൊയ്തീന്‍കുട്ടി ഫൈസി, കൊട്ടപ്പുറം അബ്ദുല്ല മാസ്റ്റര്‍, ഡോ.എന്‍.എ.എം അബ്ദുല്‍ ഖാദിര്‍, കെ.കെ ഇബ്‌റാഹിം മുസ്‌ലിയാര്‍, മൊയ്തീന്‍ മുസ്‌ലിയാര്‍ പുറങ്ങ്, ബി.എസ്.കെ തങ്ങള്‍ മലപ്പുറം, എം.എ ചേളാരി, എം.എം ഇമ്പിച്ചിക്കോയ മുസ്‌ലിയാര്‍, പി ഹസൈനാര്‍ ഫൈസി ഫറോക്ക്, ഹുസൈന്‍ കുട്ടി മൗലവി, സി. മുഹമ്മദ് ഫൈസി പാലക്കാട്, പി.കെ അബ്ദുല്‍ ഖാദിര്‍ ഖാസിമി വെന്നിയൂര്‍, അബ്ദുസ്സമദ് മുട്ടം, കെ.എല്‍ ഉമര്‍ ദാരിമി ദക്ഷിണ കന്നഡ, ടി.പി അലി ഫൈസി കാസര്‍കോട്, എന്‍.എം ഇല്യാസ് ഫൈസി തൃശൂര്‍, എം.യു ഇസ്മാഈല്‍ ഫൈസി എറണാകുളം, കെ.എം മുഹമ്മദലി മുസ്‌ലിയാര്‍ ആലപ്പുഴ, എം. ശാജഹാന്‍ അമാനി കൊല്ലം, എസ്. മുഹമ്മദ് ഹംസ സമദാനി കന്യാകുമാരി, എ.ആര്‍ ശറഫുദ്ദീന്‍ അല്‍ ജാമിഇ തിരുവനന്തപുരം, ശരീഫ് ദാരിമി ഗൂഡല്ലൂര്‍ സംസാരിച്ചു.