റിയാദ്: സഊദിയിലെ റിയാദില്‍ കഴിഞ്ഞ രണ്ടു ദിവസങ്ങളിലായി നടന്ന ലോക നേതാക്കള്‍ പങ്കെടുത്ത ജി-20 ഉച്ചകോടിക്കിടെ 26 ലക്ഷത്തിലധികം സൈബര്‍ ആക്രമണ ശ്രമം നടന്നതായി സഊദി. സഊദി നാഷണല്‍ ഇന്‍ഫര്‍മേഷന്‍ സെന്റര്‍ മേധാവിയാണ് ഇക്കാര്യം വെളിപ്പെടുത്തിയത്. ഉച്ചകോടിക്കിടെ ഇത്രയധികം സൈബര്‍ ആക്രമണ ശ്രമം നടന്നെങ്കിലും ഒന്നില്‍പോലും വിജയം കാണാന്‍ ഹാക്കര്‍മാര്‍ക്ക് കഴിഞ്ഞില്ലെന്നും അതേസമയം ആക്രമണ ശ്രമങ്ങളുടെ ഉറവിടം കണ്ടെത്താന്‍ കഴിഞ്ഞതായും നാഷണല്‍ ഇന്‍ഫര്‍മേഷന്‍ സെന്റര്‍ ഡയറക്ടര്‍ ഇസ്സാം അല്‍ വാഖിത് അല്‍ ഇഖ്ബാരിയ ചാനലിന് നല്‍കിയ അഭിമുഖത്തില്‍ പറഞ്ഞു. ഉച്ചകോടിക്ക് മുന്‍പുതന്നെ ശക്തമായ സൈബര്‍ ആക്രമണ പ്രതിരോധ നടപടികള്‍ സ്വീകരിച്ചിരുന്നു. ദേശീയ സൈബര്‍ സുരക്ഷ അതോറിറ്റിക്ക് കീഴില്‍ മാസങ്ങള്‍ക്ക് മുന്‍പുതന്നെ ഇതിനുള്ള ഒരുക്കങ്ങള്‍ ആരംഭിച്ചിരുന്നുവെന്നും അദ്ദേഹം വ്യക്തമാക്കി.