പെരളശ്ശേരി: ഒരു കാലത്ത് പച്ചപുതച്ച് കിടന്നിരുന്ന ചാല വയലിലും പരിസരത്തും മാലിന്യം തള്ളല്‍ വ്യാപകമാവുന്നു. ഇതു കാരണം പ്രദേശവാസികളില്‍ ആരോഗ്യ പ്രശ്‌നങ്ങള്‍ രൂക്ഷമാകുന്നുണ്ടെന്നാണ് പരാതി ഉയരുന്നത്. ബൈപ്പാസ് റോഡ് വന്നതിനു ശേഷമാണ് മാലിന്യം തള്ളാനായി കൂടുതല്‍ വാഹനങ്ങള്‍ രാത്രികാലങ്ങളില്‍ ഇവിടെ എത്തിത്തുടങ്ങിയത്. കേടായ പച്ചക്കറികളും ഇറച്ചി, ഭക്ഷണാവശിഷ്ടങ്ങള്‍ എന്നിവയും ചാല വയല്‍ പരിസരത്ത് ദിവസവും ചീഞ്ഞുനാറുകയാണ്. ചാലതോട് ശുചീകരിച്ചപ്പോഴും വയലിലെ മാലിന്യം നീക്കംചെയ്യാന്‍ നടപടിയുണ്ടായിട്ടില്ല. മഴ പെയ്യുമ്പോള്‍ കൃഷി നടത്തുന്ന വയലിലും പരിസരങ്ങളിലെ വീട്ടുപറമ്പുകളിലേക്കും ഇത് വ്യാപിക്കുന്നുണ്ട്. വയലിലെത്തുന്ന പ്ലാസ്റ്റിക്ക് സഞ്ചികള്‍ ഉള്‍പ്പെടെയുള്ള മാലിന്യങ്ങള്‍ കാര്‍ഷിക മേഖലയെ ദോഷകരമായി ബാധിക്കുന്നു. മാലിന്യം തള്ളുന്നവരെ കണ്ടെത്താന്‍ ചാല ബൈപ്പാസ് റോഡില്‍ ക്യാമറ സ്ഥാപിക്കണമെന്നും കുറ്റക്കാര്‍ക്കെതിരെ നിയമനടപടികള്‍ സ്വീകരിക്കണമെന്നുമാണ് നാട്ടുകാരുടെ ആവശ്യം.