സാവോപോളോ: കോപ അമേരിക്ക രണ്ടാം സെമിഫൈനലില്‍ നാളെ ചിലിയും പെറുവും തമ്മില്‍ ഏറ്റുമുട്ടും. പുലര്‍ച്ചെ ആറിനാണ് മത്സരം. ക്വാര്‍ട്ടറില്‍ ഷൂട്ടൗട്ടിനെ അതിജീവിച്ചാണ് ഇരുടീമുകളും സെമിഫൈനലിനെത്തിയത്. ചിലി കരുത്തരായ കൊളംബിയയെയും പെറു ഉറുഗ്വെയെയുമാണ് ക്വാര്‍ട്ടറില്‍ കീഴടക്കിയത്.
കോപ അമേരിക്കയില്‍ നിലവിലെ ചാംപ്യന്മാരാണ് ചിലി. 22ാം തവണയാണ് ചിലി കോപ സെമി ഫൈനലിലെത്തുന്നത്. രണ്ട് തവണ ചാംപ്യന്മാരാവുകയും ചെയ്തു. 2015, 2016 വര്‍ഷങ്ങളിലാണ് ചിലി കോപ കിരീടം ചൂടിയത്.
16ാം തവണയാണ് പെറു സെമി ഫൈനലിന് യോഗ്യത നേടുന്നത്. 1939, 1975 വര്‍ഷങ്ങളില്‍ ചാംപ്യന്മാരാവുകയും ചെയ്തു. 2015ല്‍ മൂന്നാം സ്ഥാനം നേടിയതാണ് അവസാനമായി പെറുവിന്റെ മികച്ച നേട്ടം.