ബിര്‍മിങാം: റെക്കോര്‍ഡുകള്‍ വാരിക്കൂട്ടുന്ന തിരക്കിലാണ് രോഹിത്. ഈ ലോകകപ്പില്‍ രോഹിതിന്റെ പ്രകടനം കാണുന്നവര്‍ ഇയാള്‍ മനുഷ്യനാണോ എന്ന് പോലും വിചാരിച്ചിട്ടുണ്ടാവാം. ഈ ലോകകപ്പില്‍ നാലാം സെഞ്ചുറി നേടിയ രോഹിത് ദിവസംകൂടും തോറും മറ്റു ടീമുകളുടെ പേടിസ്വപ്നമായി മാറുകയാണ്. ഇന്നലെ ബംഗ്ലാദേശിനെതിരേ നടന്ന മത്സരത്തില്‍ 104 റണ്‍സാണ് രോഹിത് അടിച്ചെടുത്തത്. ഏകദിന ക്രിക്കറ്റില്‍ തന്റെ 26ാം സെഞ്ചുറിയാണ് രോഹിത് നേടിയത്.
ഒരു ലോകകപ്പില്‍ ഏറ്റവും കൂടുതല്‍ സെഞ്ചുറികള്‍ നേടിയ ഇന്ത്യന്‍ താരമെന്ന സൗരവ് ഗാംഗുലിയുടെ റെക്കോര്‍ഡും രോഹിത് ഇതോടെ മറികടന്നു. 2003 ലോകകപ്പില്‍ ഗാംഗുലി മൂന്നു സെഞ്ചുറികള്‍ നേടിയിരുന്നു. ഇതോടൊപ്പം ഒരു ലോകകപ്പില്‍ നാല് സെഞ്ചുറികള്‍ നേടിയ ശ്രീലങ്കന്‍ താരം കുമാര്‍ സംഗക്കാരയുടെ റെക്കോഡിനൊപ്പമെത്താനും രോഹിത്തിനായി. ലോകകപ്പില്‍ ഏറ്റവും കൂടുതല്‍ സെഞ്ചുറി നേടിയ താരങ്ങളില്‍ രണ്ടാമനാണ് രോഹിത്. ആറു സെഞ്ചുറികളുമായി സച്ചിന്‍ തെണ്ടുല്‍ക്കറാണ് ഈ പട്ടികയില്‍ മുന്നില്‍. അഞ്ചു സെഞ്ചുറികള്‍ ഇപ്പോള്‍ രോഹിത്തിന്റെ അക്കൗണ്ടിലുണ്ട്. ദക്ഷിണാഫ്രിക്ക, പാകിസ്താന്‍, ഇംഗ്ലണ്ട് എന്നിവര്‍ക്കെതിരേയായിരുന്നു ഈ ലോകകപ്പില്‍ രോഹിത്തിന്റെ മറ്റു സെഞ്ചുറികള്‍. റിക്കി പോണ്ടിങ്, സംഗക്കാര എന്നിവരും ലോകകപ്പില്‍ അഞ്ചു സെഞ്ചുറികള്‍ നേടിയിട്ടുണ്ട്.
ബംഗ്ലാദേശിനെതിരായ മത്സരത്തില്‍ 104 റണ്‍സെടുത്തതോടെ തുടര്‍ച്ചയായി മൂന്നാം തവണയും ഒരു കലണ്ടര്‍ വര്‍ഷത്തില്‍ 1000 റണ്‍സ് തികയ്ക്കാന്‍ രോഹിത്തിനായി. സച്ചിന്‍ തെണ്ടുല്‍ക്കര്‍ (1996, 1997, 1998), എം.എസ് ധോനി (2007, 2008, 2009), വിരാട് കോഹ്‌ലി (2011, 2012, 2013) എന്നിവരാണ് രോഹിത്തിനു മുന്‍പ് ഈ നേട്ടം സ്വന്തമാക്കിയവര്‍.
സെഞ്ചുറി നേട്ടത്തോടെ ഈ ലോകകപ്പിലെ റണ്‍വേട്ടക്കാരുടെ പട്ടികയിലും രോഹിത് ഒന്നാമതെത്തി. എട്ടു മത്സരങ്ങളില്‍ നിന്ന് 544 റണ്‍സാണ് രോഹിത് നേടിയത്. 541 റണ്‍സുമായി ഷാക്കിബ് അല്‍ ഹസനാണ് രണ്ടാമത്.