വാണിമേല്‍: വാണിമേലില്‍ നിന്ന് സര്‍വിസ് നടത്തുന്ന ഓട്ടോ- ജീപ്പ് ടാക്‌സി ഡ്രൈവര്‍മാര്‍ തമ്മില്‍ സംഘര്‍ഷം. വാണിമേലില്‍ നിന്നും ട്രിപ്പ് നടത്തുന്നതിനെച്ചൊല്ലിയുള്ള തര്‍ക്കമാണ് സംഘര്‍ഷത്തിലെത്തിയത്.
ഇന്നലെ വൈകുന്നേരം നാലര മണിയോടെയാണ് സംഭവം. ഒരാഴ്ചയിലധികമായി ഡ്രൈവര്‍മാര്‍ തമ്മില്‍ സ്‌കൂള്‍ കുട്ടികളെ വാഹനത്തില്‍ കയറ്റുന്നതിനെ ചൊല്ലി തര്‍ക്കമുണ്ടായിരുന്നു.
നേരത്തെ വെള്ളിയോട് സ്‌കൂളിലേക്ക് പോകുന്ന കുട്ടികളെ ജീപ്പില്‍ കയറ്റിയത് ഒരു സംഘം ഓട്ടോക്കാര്‍ തടഞ്ഞിരുന്നു. ഇതേത്തുടര്‍ന്ന് സംയുക്ത മോട്ടോര്‍ തൊഴിലാളി യൂനിയന്‍ യോഗം ചേര്‍ന്ന് ജീപ്പ് സര്‍വിസ് നടത്തുന്ന റൂട്ടില്‍ ഓട്ടോക്കാരും ഓട്ടോയുടെ റൂട്ടില്‍ ജീപ്പും സര്‍വിസ് നടത്തരുതെന്ന് തീരുമാനിച്ചിരുന്നു.
എന്നാല്‍ ഇന്നലെ ഒരു വിഭാഗം ഓട്ടോക്കാര്‍ തീരുമാനം ലംഘിച്ച് സ്‌കൂള്‍കുട്ടികളെ കുത്തിനിറച്ച് സര്‍വിസ് നടത്തിയത് ജീപ്പ് ഡ്രൈവര്‍മാര്‍ തടയുകയായിരുന്നു. ഇതേത്തുടര്‍ന്നാണ് സംഘര്‍ഷാവസ്ഥ ഉടലെടുത്തത്. വളയം പൊലിസ് സ്ഥലത്തെത്തി സംഘര്‍ഷാവസ്ഥ നിയന്ത്രിച്ചു. പ്രശ്‌ന പരിഹാരത്തിനായി ഇരുവിഭാഗത്തെയും പൊലിസ് ഇന്ന് ചര്‍ച്ചക്ക് വിളിച്ചിട്ടുണ്ട്.