ന്യൂഡല്‍ഹി: കേന്ദ്ര സര്‍ക്കാരിന്റെ കര്‍ഷക വിരുദ്ധ നയങ്ങള്‍ക്കെതിരേ പ്രക്ഷോഭത്തിനിറങ്ങിയ കര്‍ഷകരെ ഹരിയാനയില്‍ പൊലിസ് കൂട്ടത്തോടെ അറസ്റ്റ് ചെയ്തു.
ആള്‍ ഇന്ത്യ കിസാന്‍ സംഘര്‍ഷ് കോഓര്‍ഡിനേഷന്‍ കമ്മിറ്റി പ്രഖ്യാപിച്ച ''ദില്ലി ചലോ'' പ്രക്ഷോഭം നടക്കാനിരിക്കേയാണ് അറസ്റ്റ്. ഇന്നും നാളെയുമാണ് ''ദില്ലി ചലോ'' പ്രക്ഷോഭം. അറസ്റ്റിനെ തുടര്‍ന്ന് സംസ്ഥാനത്തിന്റെ പല ഭാഗങ്ങളിലും വിവിധ കര്‍ഷക കൂട്ടായ്മകളും തൊഴിലാളി യൂനിയനുകളും പ്രതിഷേധവുമായി രംഗത്തെത്തി.
ചൊവ്വാഴ്ച പുലര്‍ച്ചെതന്നെ ഹരിയാനയിലെ മുഴുവന്‍ കര്‍ഷക നേതാക്കളെയും കസ്റ്റഡിയിലെടുത്തതായി സ്വരാജ് ഇന്ത്യ പ്രസിഡന്റ് യോഗേന്ദ്ര യാദവ് പറഞ്ഞു. അതേസമയം, നേതാക്കളെ അറസ്റ്റ് ചെയ്‌തെങ്കിലും സമരത്തില്‍ നിന്ന് പിന്നോട്ടില്ലെന്നും ദില്ലി ചലോ പ്രക്ഷോഭം പ്രഖ്യാപിക്കപ്പെട്ടതുപോലെ തന്നെ നടക്കുമെന്നും കര്‍ഷക സംഘടനകള്‍ അറിയിച്ചു.