കട്ടക്ക്: മലയാളി താരം സി.കെ വിനീത് ഇരട്ട ഗോളുകള്‍ നേടി ബംഗളൂരു എഫ്.സിക്ക് ഫെഡറേഷന്‍ കപ്പ് ഫുട്‌ബോള്‍ കിരീടം സമ്മാനിച്ചു. നിലവിലെ ചാംപ്യന്‍മാരായ മോഹന്‍ ബഗാനെ അധിക സമയത്ത് വിനീത് നേടിയ രണ്ട് ഗോളുകളുടെ കരുത്തിലാണ് ബംഗളൂരു വീഴ്ത്തിയത്.
നിശ്ചിത സമയത്ത് ഇരു ടീമുകളും ഗോളടിക്കാതെ പിരിഞ്ഞപ്പോള്‍ മത്സരം അധിക സമയത്തേക്ക് നീളുകയായിരുന്നു. അധിക സമയത്തിന്റെ 107ാം മിനുട്ടിലാണ് വിനീത് ബംഗളൂരുവിന് ലീഡ് സമ്മാനിച്ചത്. മോഹന്‍ ബഗാന്‍ പ്രതിരോധം പാളിപ്പോയ നിമിഷത്തില്‍ അവസരം മുതലെടുത്ത് വിനീത് വല ചലിപ്പിച്ചപ്പോള്‍ കൊല്‍ക്കത്തന്‍ കരുത്തരുടെ ഗോള്‍ കീപ്പര്‍ ദേബ്ജിത് മജുംദാര്‍ നിസഹായനായിരുന്നു. വിജയമുറപ്പാക്കിയ മലയാളി താരത്തിന്റെ രണ്ടാം ഗോള്‍ 119ാം മിനുട്ടിലും പിറന്നതോടെ ബംഗളൂരു സുരക്ഷിതരായി കിരീടത്തില്‍ മുത്തമിട്ടു.
പ്രധാന താരങ്ങളായ സുനില്‍ ഛേത്രി, കാമറോണ്‍ വാട്‌സന്‍ എന്നിവരുടെ അസാന്നിധ്യത്തിലാണ് ബംഗളൂരു മോഹന്‍ ബഗാനെ നേരിടാനിറങ്ങിയത്. രണ്ട് തവണ ഐ ലീഗ് ചാംപ്യന്‍മാരായ ബംഗളൂരു രണ്ടാം ഫെഡറേഷന്‍ കപ്പാണ് സ്വന്തമാക്കിയത്. നേരത്തെ 2014-15 വര്‍ഷത്തില്‍ ബംഗളൂരു കന്നി കിരീടം സ്വന്തമാക്കിയിരുന്നു.