ന്യൂഡല്‍ഹി: സന്നാഹ മത്സരത്തില്‍ ഇറ്റലിയെ തോല്‍പിച്ചെന്ന വാര്‍ത്ത പുറത്ത് വിട്ടതിന്റെ വിശദീകരണവുമായി അഖിലേന്ത്യ ഫുട്‌ബോള്‍ ഫെഡറേഷന്‍ രംഗത്തെത്തി. ഇറ്റാലിയന്‍ ഫുട്‌ബോള്‍ ഫെഡറേഷന്റെ അനുമതിയോടെയുളള ടീമിനെതിരേ തന്നെയാണ് ഇന്ത്യന്‍ ടീം കളിച്ചത്. ഇറ്റാലിയന്‍ ഫുട്‌ബോള്‍ ഫെഡറേഷനുമായി എ.ഐ.എഫ്.എഫ് സംസാരിച്ചിരുന്നു. ഇതിന്റെ ഫലമായി അവരുടെ അനുമതിയോടെ ഇറങ്ങിയ ടീമായിരുന്നു വെള്ളിയാഴ്ച്ച കളിച്ചത്.
ദേശീയ ടീം ജഴ്‌സിയിലാണ് ആ ടീം ഇന്ത്യക്കെതിരേ കളിക്കാനിറങ്ങിയതും. അതിനാല്‍ അത് ഇറ്റാലിയന്‍ ദേശീയ ടീം അല്ല എന്നതിന് ഒരു തെളിവും ഇല്ല. ഇറ്റലി തിരഞ്ഞെടുത്ത ടീം ചിലപ്പോള്‍ അവരുടെ പ്രധാന ടീം ആയിരിക്കില്ല. അതിന് ഇന്ത്യന്‍ ഫുട്‌ബോള്‍ അധികൃതരെ അധിക്ഷേപിക്കുന്നതില്‍ എന്ത് കാര്യമാണ് ഉളളത്. ഇന്ത്യക്കെതിരേ അണിനിരന്ന ടീം ഇറ്റാലിയന്‍ ദേശീയ ടീമിനെയാണ് പ്രതിനിധീകരിച്ചത് എന്ന കാര്യത്തില്‍ ഇന്ത്യന്‍ ഫുട്‌ബോള്‍ ഫെഡറേഷന് സംശയമില്ലെന്നും അധികൃതര്‍ വിശദീകരിച്ചു.