പള്ളിപ്പുറം: ഉഗ്രശബ്ദം കേട്ട് ഞെട്ടിയുണര്‍ന്ന് വീടിന് പുറത്ത് ഇറങ്ങുമ്പോള്‍ കാണുന്നത് ദേശീയപാത റോഡ് അരികിലെ മരത്തിന് ചുവട്ടിലെ പുകപടലമായിരുന്നു. അപകടം നടന്ന് നിമിഷങ്ങള്‍ക്കകം സ്ഥലത്ത് പാഞ്ഞെത്തിയ സമീപവാസിയായ 72കാരന്‍ ദേവദാസിന്റെ വാക്കുകളാണിത്. അടുത്തെത്തുമ്പോഴാണ് വാഹനം മരത്തിലിടിച്ച് കയറിയ കാഴ്ച കാണുന്നത്. കാര്‍ കാണാന്‍ കഴിയാത്തവസ്ഥയില്‍ പുകമൂടിയ അവസ്ഥയിലായിരുന്നു.
ഒറ്റക്ക് എന്ത്‌ചെയ്യണമെന്ന് അറിയാത്ത അവസ്ഥയിലായിരുന്നു ദേവസ്. ഇതിനിടെ ദേശീയപാതയിലൂടെ വന്ന നിരവധി വാഹനങ്ങള്‍ കടന്ന് പോയെങ്കിലും ആരും നിര്‍ത്തിയില്ല. ഇതിനിടെ ഒരു വാഹനം നിര്‍ത്തി അതിലുണ്ടായിരുന്ന യാത്രകാരും ചേര്‍ന്ന് കാര്‍ പരിശോധിക്കുമ്പോഴാണ് യുവാവും കുഞ്ഞും മുന്‍സീറ്റില്‍ രക്തത്തില്‍ കുളിച്ചവസ്ഥയില്‍ കണ്ടത്. കാര്‍ ഞെരിമര്‍ന്ന് നാലു ഡോറും തുറക്കാന്‍ കഴിയാതെ അവസ്ഥയായിരുന്നു. പിന്നാലെ വന്ന വാഹനങ്ങളൊക്കെ നിര്‍ത്തിയെങ്കിലും ഡോറോ ഗ്ലാസോ പൊട്ടിച്ച് ഇവരെ പുറത്തെടുക്കാന്‍ പറ്റുന്ന വസ്തുക്കള്‍ ഒന്നും കിട്ടിയില്ല. ഇതിനിടയില്‍ ദേവദാസ് വീട്ടിലേക്ക് പാഞ്ഞു. സെക്കന്‍ഡുകള്‍ക്കുള്ളില്‍ കമ്പിപ്പാരയുമായൈത്തി ഡോര്‍ കുത്തിതുറന്ന് ആദ്യം കുഞ്ഞിനെ പുറത്തെടുത്ത് സ്ഥലത്ത് എത്തിയ ആംബുലന്‍സില്‍ ആശുപത്രിയിലേക്ക് വിട്ടു.
രണ്ടാമതാണ് ബാലഭാസ്‌കറെയും ഭാര്യയെയും ഡ്രൈവറെയും പിന്നാലെ വന്ന ആംബുലന്‍സുകളില്‍ സ്വകാര്യ ആശുപത്രിയില്‍ പ്രവേശിപ്പിച്ചത്. ഇതിനിടയില്‍ മംഗലപുരത്ത് നിന്ന് അഡീഷനല്‍ എസ്.ഐ നാരായണന്‍കുട്ടിയും സംഘവും കഴക്കൂട്ടത്ത് നിന്നും ഫയര്‍ഫോഴ്‌സും പാഞ്ഞെത്തിയിരുന്നു. പിന്നീട് പൊലിസും മറ്റ് വാഹനങ്ങളിലെ യാത്രകാരുമാണ് കേരളമറിയുന്ന കലാകരനും കുടുംബവുമാണ് അപകടത്തില്‍പ്പെട്ടതെന്ന് മനസിലാക്കിയത്. അപകടം നടന്നെങ്കിലും എന്‍ജിന്‍ ഓഫായില്ലെന്ന് ദേവദാസ് പറയുന്നു. തകര്‍ന്ന കാറിലെ ഓയിലും ഡീസലും റോഡില്‍ ചോര്‍ന്നതും പുക പടര്‍ന്നതും രക്ഷാപ്രവര്‍ത്തനം നടത്തിയവരെ ആശങ്കിലാക്കി.
ഈ സമയം തീപിടിക്കാത്തത് ഭാഗ്യമായെന്ന് ദേവദാസ് പറഞ്ഞു. കാറിനകത്ത് രക്ഷാകവചമായി എയര്‍ബാഗ് സംവിധാനമുണ്ടായിരുന്നുവെങ്കിലും വേണ്ടത്ര ഫലമുണ്ടായില്ലെന്ന് പൊലിസ് പറഞ്ഞു. അപകടത്തില്‍പ്പെട്ടത് രാജ്യമറിയുന്ന വയലിന്‍ വായനക്കാരനായ ബാലഭാസ്‌കറും കുടുംബവുമാണെന്നറിഞ്ഞതോടെ പ്രദേശവാസികളടക്കം വിവിധ പ്രദേശങ്ങളില്‍ നിന്നും അപകട സ്ഥലത്ത് എത്തിയത് നൂറ് കണക്കിനാളുകളാണ്.