സ്വന്തം ലേഖകന്‍
തിരുവനന്തപുരം: തമിഴ്‌നാട് തീരത്ത് പ്രവേശിച്ച 'നിവര്‍' ചുഴലിക്കാറ്റ് ദുര്‍ബലമായിത്തുടങ്ങിയെന്ന് കേന്ദ്രകാലാവസ്ഥാവകുപ്പ് അറിയിച്ചു.
അതിതീവ്ര ചുഴലിക്കാറ്റായി തീരത്ത് പ്രവേശിച്ച 'നിവര്‍' ഇന്നലെ രാവിലെയോടെ വേഗത കുറഞ്ഞ് ചുഴലിക്കാറ്റും വൈകുന്നേരത്തോടെ തീവ്ര ന്യൂനമര്‍ദവുമായി ദുര്‍ബലപ്പെട്ടു. വടക്കുപടിഞ്ഞാറന്‍ ദിശയിലായിരിക്കും തുടര്‍ന്നുള്ള സഞ്ചാരമെന്ന് കേന്ദ്ര കാലാവസ്ഥാവകുപ്പ് പറയുന്നു. അതേദിശയില്‍ കര്‍ണാടകയിലെ ബെല്ലാരി വഴി അറബിക്കടല്‍ ലക്ഷ്യമാക്കി നീങ്ങാനാണ് സാധ്യതയെന്ന് സ്വകാര്യ ഏജന്‍സിയായ മെറ്റ്ബീറ്റ് വെതര്‍ പറയുന്നു.അറബിക്കടല്‍ ലക്ഷ്യമാക്കി സഞ്ചരിക്കുന്നതിനാല്‍ മധ്യകേരളത്തിലും വടക്കന്‍ കേരളത്തിലും ഇന്ന് ഒറ്റപ്പെട്ട മഴയ്ക്ക് സാധ്യതയുണ്ടെന്നും പ്രവചനമുണ്ട്. മറ്റു മുന്നറിയിപ്പുകളൊന്നുമില്ല.
അതേസമയം തിങ്കളാഴ്ചയോടെ ബംഗാള്‍ ഉള്‍ക്കടലില്‍ വീണ്ടും ന്യൂനമര്‍ദം രൂപപ്പെടാന്‍ സാധ്യതയുണ്ടെന്ന് വിദഗ്ധര്‍. ബംഗാള്‍ ഉള്‍ക്കടലില്‍ ശ്രീലങ്കയ്ക്കും ആന്‍ഡമാന്‍ നിക്കോബാര്‍ ദ്വീപ സമൂഹത്തിനും സമീപത്തായിരിക്കും പുതിയ ന്യൂനമര്‍ദം. ഇത് ശക്തിപ്പെട്ട് തമിഴ്‌നാട് തീരം ലക്ഷ്യമാക്കി സഞ്ചരിക്കാനാണ് സാധ്യതയെന്നും വിദഗ്ധര്‍ പറയുന്നു. ഇത് ശക്തമായ ചുഴലിക്കാറ്റായി മാറിയാല്‍ മാലിദ്വീപ് നിര്‍ദേശിച്ച 'ബുറെവി' എന്ന പേരാവും നല്‍കുക.