എടവണ്ണപ്പാറ: ജനജീവിതത്തെ ഭീഷണിയിലാക്കി ഭീമന്‍ കടന്നല്‍ കൂട്. ഓമാനൂര്‍ കിഴിശ്ശേരി റോഡില്‍ മുണ്ടക്കല്‍ സ്‌കൂളിനും മദ്‌റസക്കും ഇടയിലുള്ള മരത്തിലാണ് കൂട് സ്ഥിതി ചെയ്യുന്നത്. കഴിഞ്ഞ ദിവസം വിദ്യാര്‍ഥികള്‍ ഉള്‍പെടെ ചിലര്‍ക്ക് കടന്നലുകളുടെ കുത്തേല്‍ക്കുകയും അപകടം സംഭവിക്കുകയും ചെയ്തിട്ടുണ്ട്.
കുത്തേറ്റവരെ എടവണ്ണപ്പാറ സ്വകാര്യ ആശുപത്രിയിലും ഗുരുതരമായി കുത്തേറ്റ വിദ്യാര്‍ഥിനിയായ മധുവിന്റെ ശിവനന്ദയേയും അബ്ദുല്‍ ഖാദറിനേയും കോഴിക്കോട് മെഡിക്കല്‍ കോളജിലും പ്രവേശിപ്പിച്ചു.
കടന്നലുകള്‍ കൂട്ടത്തോടെ ആക്രമിച്ചാല്‍ പെട്ടെന്ന് തന്നെ മരണം സംഭവിക്കുമെന്നതിനാല്‍ നാട്ടുകാര്‍ക്ക് അടുക്കാന്‍ പോലും കഴിയാത്ത അവസ്ഥയിലാണ്.
എങ്ങിനെയെങ്കിലും കടന്നല്‍ കൂട് ഒഴിവാക്കിയില്ലെങ്കില്‍ സ്‌കൂള്‍, മദ്‌റസ കുട്ടികള്‍ക്ക് അപകടം സംഭവിക്കാനുള്ള സാധ്യതയുമുണ്ട്.