ചേര്‍ത്തല: നഗരസഭ 13-ാം വാര്‍ഡ് ഉപതെരഞ്ഞെടുപ്പില്‍ 83.69 ശതമാനം പോളിങ് രേഖപ്പെടുത്തി. ആകെയുള്ള 791 വോട്ടര്‍മാരില്‍ 662 പേരാണ് വോട്ട് ചെയ്തത്. വോട്ടിങ് യന്ത്രം ഉപയോഗിച്ചാണ് പോളിങ് നടന്നത്.
ഇന്ന് രാവിലെ എട്ടിന് മുനിസിപ്പല്‍ ഓഫീസ് ഹാളില്‍ വോട്ടെണ്ണല്‍ നടക്കും. 15 മിനിട്ടിനകം ഫലമറിയാന്‍ സാധിക്കും. സ്വതന്ത്രനായ എം ജയശങ്കര്‍ കൗണ്‍സിലര്‍ സ്ഥാനം രാജിവെച്ചതിനെ തുടര്‍ന്നാണ് തെരഞ്ഞെടുപ്പ് വേണ്ടിവന്നത്. കോണ്‍ഗ്രസിലെ അജിത് ചാരങ്കാട്ട്, എല്‍ഡിഎഫ് സ്വതന്ത്രന്‍ ജെ.ഗോപിനാഥപൈ, ബിജെപിയിലെ ജ്യോതിഷ് ഡി ഭട്ട് എന്നിവര്‍ തമ്മിലുള്ള ശക്തമായ ത്രികോണ മത്സരമാണ് നടന്നത്. നേരിയഭൂരിപക്ഷം മാത്രമുള്ള നഗരസഭയിലെ യുഡിഎഫ് ഭരണത്തെ  വിജയ പരാജയങ്ങള്‍ സ്വാധീനിക്കില്ലെങ്കിലും വിദ്യാഭ്യാസ സ്ഥിരം സമിതി നിലനിര്‍ത്താന്‍ യുഡിഎഫിനു വിജയം അനിവാര്യമാണ്. 35 അംഗ നഗരസഭയിലെ കക്ഷിനില ഇപ്രകാരമാണ്. യുഡിഎഫ്-19 (കോണ്‍ഗ്രസ്-17, കേരള കോണ്‍ഗ്രസ്-2), എല്‍ഡിഎഫ്-14 (സിപിഎം-10, സിപിഐ-3, കോണ്‍ഗ്രസ് എസ്-ഒന്ന്), സ്വതന്ത്രന്‍-ഒന്ന്.