ഗുരുവായൂര്‍: ചൊവ്വല്ലൂര്‍പ്പടി മേഖലയില്‍ തണ്ണീര്‍ തടങ്ങളും കുളങ്ങളും തോടുകളും കയ്യേറി ഭൂമി നികത്തുന്ന ഭൂമാഫിയകളെ നഗരസഭ, റവന്യൂ അധികൃതര്‍ സംരക്ഷിക്കുന്നതായി ആക്ഷന്‍ കൗണ്‍സില്‍ ഭാരവാഹികള്‍ ആരോപിച്ചു. ചൊവ്വല്ലൂര്‍പ്പടി - തൈക്കാട് മേഖലയിലെ തോടും കുളങ്ങളും ഭൂമാഫിയ മണ്ണിട്ട് നികത്തിയതോടെ വേനല്‍ കാലത്ത് കുടി വെള്ള ക്ഷാമവും മഴക്കാലത്ത് കനത്ത വെള്ളക്കെട്ട് ദുരിതവും അനുഭവിക്കേണ്ട അവസ്ഥയിലാണ് പ്രദേശ വാസികള്‍. ഭൂമാഫിയക്ക് അനുകൂലമായി റവന്യു ഉദ്യോഗസ്ഥരും, നഗരസഭ അധികൃതരും നിലകൊണ്ടതോടെയാണ് കയ്യേറ്റത്തിനും നികത്തലിനും മാഫിയയ്ക്ക് ധൈര്യം ലഭിച്ചതെന്ന് ആക്ഷന്‍ കൗണ്‍സില്‍ ഭാരവാഹികള്‍ കുറ്റപ്പെടുത്തി.
ഭൂമാഫിയയെ സംരക്ഷിക്കുന്ന നഗരസഭ അധികൃതര്‍ക്കെതിരെ പ്രത്യക്ഷ സമര പരിപാടികള്‍ ആവിഷ്‌ക്കരിക്കുമെന്നും ആക്ഷന്‍ കമ്മറ്റി സെക്രട്ടറി കെ.എസ്.ബാലകൃഷ്ണന്‍, ഭാരവാഹികളായ എ.കെ.അബ്ബാസ്, പി.എഫ്.ഷൈജു, വി.എച്ച്.ഷാബുദ്ദീന്‍, വി.എച്ച്.ഷാജു അറിയിച്ചു.