കോഴിക്കോട്: ഖത്തര്‍ കേന്ദ്രീകരിച്ച് പ്രവര്‍ത്തിക്കുന്ന സാംസ്‌കാരിക സംഘടനയായ പ്രവാസി ദോഹയും പ്രവാസി ട്രസ്റ്റും വൈക്കം മുഹമ്മദ് ബഷീറിന്റെ സ്മരണാര്‍ത്ഥം ഏര്‍പ്പെടുത്തിയ 25ാ മത് ബഷീര്‍ പുരസ്‌കാരം നടന്‍ മമ്മൂട്ടിക്ക് നല്‍കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. നടന്‍ എന്ന നിലയിലുള്ള മമ്മൂട്ടിയുടെ പകര്‍ന്നാട്ടവും മറ്റ് പ്രവര്‍ത്തനങ്ങളും പരിഗണിച്ചാണ് അവാര്‍ഡ് നല്‍കുന്നത്. കൂടാതെ അവാര്‍ഡ് ജേതാവിന്റെ ദേശത്തെ പഠിക്കാന്‍ മിടുക്കനായ ,സാമ്പത്തികമായി പിന്നോക്കം നില്‍കുന്ന ഒരു വിദ്യാര്‍ഥിക്ക് 15,000 രൂപയുടെ പ്രൊഫ. എം.എന്‍ വിജയന്‍ സ്മാരക എന്‍ഡോവ്‌മെന്റ് സ്‌കോളര്‍ഷിപ്പും അവാര്‍ഡ് ദാന ചടങ്ങില്‍ നല്‍കും.

എം.ടി വാസുദേവന്‍ നായര്‍ ചെയര്‍മാനും പ്രൊഫ. എം.എ റഹ്മാന്‍, ബാബു മേത്തര്‍, കെ.കെ സുധാകരന്‍, സി.വി റപ്പായി, പി.ഷംസുദ്ദീന്‍ എന്നിവരുമടങ്ങുന്ന കമ്മിറ്റിയാണ് അവാര്‍ഡ് നിര്‍ണയിച്ചത്. ആര്‍ട്ടിസ്റ്റ് നമ്പൂതിരി രൂപകല്‍പ്പന ചെയ്ത ഗ്രാമഫോണ്‍ ശില്‍പവും 50,000 രൂപയും പ്രശസ്തി പത്രവുമാണ് പുരസ്‌കാരം. വാര്‍ത്താസമ്മേളനത്തില്‍ ബഷീറിന്റെ മകന്‍ അനീസ് ബഷീര്‍, ആര്‍.കെ പ്രേമന്‍, റഫീക്ക് പാറോളി, കെ.എസ് വെങ്കിടാചലം, ബാലചന്ദ്രന്‍ പുതുക്കുടി, റഹീം, പി.പി ചന്ദ്രന്‍ പങ്കെടുത്തു.