നാദാപുരം: ഓടിക്കൊണ്ടിരിക്കെ ഓട്ടോറിക്ഷക്ക് തീപിടിച്ചു. പാറക്കടവില്‍ നിന്ന് നാദാപുരത്തേക്ക് യാത്രക്കാരുമായി പോവുകയായിരുന്ന ഓട്ടോറിക്ഷ ആവടിമുക്കില്‍ വച്ചാണ് തീപിടിച്ചത്. ഇന്നലെ വൈകിട്ട് മൂന്നോടെയാണ് സംഭവം. ജോലി കഴിഞ്ഞ് താമസസ്ഥലത്തേക്ക് പോവുകയായിരുന്ന ഇതരസംസ്ഥാന തൊഴിലാളികളാണ് ഓട്ടോറിക്ഷയിലുണ്ടായിരുന്നത്.
യാത്രക്കിടെ റോഡിലെ കുഴിയില്‍ വീഴുകയും പെട്ടെന്ന് തീപിടിക്കുകയുമായിരുന്നു. വാഹനത്തിലുണ്ടായിരുന്ന യാത്രക്കാരും ഡ്രൈവറും പുറത്തേക്ക് ചാടിയതിനാല്‍ വന്‍ അപകടമൊഴിവായി. മറ്റു വാഹനങ്ങളിലുള്ള യാത്രക്കാര്‍ തീയണക്കാന്‍ ശ്രമിച്ചെങ്കിലും ശ്രമം പരാജയപ്പെട്ടതോടെ ഫയര്‍ഫോഴ്‌സില്‍ വിവരമറിയിക്കുകയായിരുന്നു. തുടര്‍ന്ന് ചേലക്കാട് നിന്ന് ഫയര്‍ഫോഴ്‌സ് യൂനിറ്റെത്തിയാണ് തീയണച്ചത്. അപകടത്തില്‍ ഓട്ടോയ്ക്ക് സാരമായ കേടുപാടുകള്‍ സംഭവിച്ചിട്ടുണ്ട്.