കോഴിക്കോട്: സജീവ് പിള്ള തിരക്കഥ എഴുതി എം. പത്മകുമാര്‍ സംവിധാനം ചെയ്യുന്ന മമ്മൂട്ടി ചിത്രമായ മാമാങ്കത്തിനെതിരേ പരാതിയുമായി രാജകീയ കൂട്ടായ്മ രംഗത്ത്. മാമാങ്കം സിനിമയില്‍ യഥാര്‍ഥ മാമാങ്ക ചരിത്രത്തെ വികലമാക്കുന്ന രീതിയിലാണ് ചിത്രീകരിക്കാന്‍ ശ്രമിക്കുന്നതെന്നും ഇതിനെതിരേ സെന്‍സര്‍ ബോര്‍ഡിനെ സമീപിക്കുമെന്നും രാജകീയ കൂട്ടായ്മ കണ്‍വീനര്‍ രവി വര്‍മ്മരാജ വാര്‍ത്താസമ്മേളനത്തില്‍ അറിയിച്ചു.
ചേരരാജാക്കന്‍മാരുടെ കിരീടധാരണ ചടങ്ങായിരുന്നു മാഘമാകം എന്ന പേരില്‍ ചരിത്രത്തില്‍ ഇടം നേടിയ മാമാങ്കം. 28 ദിവസമായിരുന്നു ചടങ്ങ് നടന്നത്. കിരീടധാരണത്തോടൊപ്പം ചേര ചക്രവര്‍ത്തി ഭരണപരമായ തീരുമാനങ്ങള്‍ എടുത്തിരുന്നതും കൈമാറിയിരുന്നതും മാമാങ്കത്തില്‍വച്ചായിരുന്നു. സാമൂതിരിയുടെ കൈകളില്‍ രക്ഷാകര്‍തൃസ്ഥാനം വന്നതിനു ശേഷമാണ് മാമാങ്കത്തിന്റെ രീതി യുദ്ധത്തിലേക്ക് വഴിമാറിയത്.
സാമൂതിരി ആക്രമണവുമായി ബന്ധപ്പെട്ട യുദ്ധവും ചാവേറുകളുടെയും കേന്ദ്രമാക്കിയാണ് സിനിമ ചിത്രീകരിക്കുന്നത്. യഥാര്‍ഥ മാമാങ്ക ചരിത്രത്തെ ഇത് വികലമാക്കുമെന്നും യഥാര്‍ഥ വസ്തുതകള്‍ കൂടി ഉള്‍പ്പെടുത്തി സിനിമ പുറത്തിറക്കാന്‍ സംവിധായകന്‍ തയാറാകണമെന്നും രാജകീയ കൂട്ടായ്മയും ചരിത്രകാരന്‍ സജീവന്‍ പുതവാശ്ശേരിയും ആവശ്യപ്പെട്ടു.