ന്യൂഡല്‍ഹി: എല്ലാ വര്‍ഷവും ബജറ്റിനോളം തന്നെ ശ്രദ്ധ നേടാറുണ്ട് ബജറ്റ് രേഖകളടങ്ങിയ പെട്ടിയും. രേഖകളടങ്ങിയ പെട്ടി ധനമന്ത്രിമാര്‍ ധനമന്ത്രാലയത്തിലേക്കും പാര്‍ലമെന്റിലേക്കും കൊണ്ടുവരുന്നത് തന്നെ ഒരു കാഴ്ചയാണ്. പെട്ടി ഉയര്‍ത്തിക്കാട്ടി, ബജറ്റിന് പിന്നില്‍ പ്രവര്‍ത്തിച്ച ഉദ്യോഗസ്ഥര്‍ക്കും സഹമന്ത്രിമാര്‍ക്കുമൊപ്പം ധനമന്ത്രാലയത്തിന് മുന്നില്‍ വച്ച് കേന്ദ്രധനമന്ത്രിമാര്‍ ഒരു ഫോട്ടോ സെഷനൊക്കെ നടത്താറുണ്ട്. കഴിഞ്ഞ വര്‍ഷങ്ങളിലൊന്നും ഈ പതിവ് ധനമന്ത്രിമാര്‍ തെറ്റിച്ചിട്ടില്ല.

ഇത്തവണയും പതിവൊന്നും തെറ്റിയില്ല. ധനമന്ത്രാലയത്തിലെത്തി. രാഷ്ട്രപതിയെ കണ്ടു അനുമതി വാങ്ങി. പാര്‍ലമെന്റിന് മുന്നില്‍ ഫോട്ടോയെടുപ്പും നടന്ന. ഒരു വ്യത്യാസം മാത്രം. രേഖകള്‍ കൊണ്ടുവരാന്‍ ഇത്തവണ പെട്ടിയില്ല. ചുവന്ന തുണി നാലാക്കി മടക്കിയതില്‍ പൊതിഞ്ഞാണ് നിര്‍മല സീതാരാമന്‍ രേഖകള്‍ കൊണ്ടു വന്നത്.  

ബ്രിട്ടീഷുകാരുടെ കാലത്തുള്ള നടപ്പിനാണ് ഇതോടെ അന്ത്യമായിരിക്കുന്നത്.