റിയാദ്: സഊദിയിൽ ഞായർ വരെ ഇടിയോട് കൂടിയ മഴ തുടരുമെന്ന് നിരീക്ഷണം. വടക്കുകിഴക്കന്‍ മേഖലയില്‍ ഉൾപ്പെടെ ചില മേഖലകളിൽ ഞായറാഴ്ച വരെ ഇടിയോടുകൂടെയുള്ള മഴക്കാണ് സാധ്യതയെന്ന് പ്രമുഖ കാലാവസ്ഥാ നിരീക്ഷണ സൈറ്റായ മെറ്റ്ബീറ്റ് വെതർ സർവീസ് റിപ്പോർട്ട് ചെയ്തു. മൂടിക്കെട്ടിയ അന്തരീക്ഷമായിരിക്കുന്ന ഇവിടെ തെക്കു നിന്നുള്ള ശക്തമായ കാറ്റിനും സാധ്യതയുണ്ട്. തണുത്ത വരണ്ട കാറ്റിന്റെ പ്രവാഹവും ഈര്‍പ്പമുള്ള തെക്കന്‍ മേഖലയില്‍ നിന്നുള്ള കാറ്റിന്റെ സംയോജനവുമാണ് മഴക്ക് കാരണമാകുന്നത്.

    വെള്ളിയാഴ്ച രാത്രി തുടങ്ങുന്ന മഴ മൂലം ചില മേഖലയില്‍ ശക്തമായ കുത്തൊഴുക്കുണ്ടാകും. ജിദ്ദയില്‍ തെക്ക്, കിഴക്ക് മേഖലയില്‍ വെള്ളിയാഴ്ച രാത്രി മുതല്‍ മഴ ലഭിക്കുന്നതോടൊപ്പം രാത്രി താപനില 22 ഡിഗ്രി സെല്‍ഷ്യസും പകല്‍ താപനില 32 ഡിഗ്രിയുമായി കുറയും. ജിദ്ദയുടെ തെക്കന്‍ തീര മേഖലയിലും ഡിസംബര്‍ ആദ്യവാരം വരെ അസ്ഥിര കാലാവസ്ഥ തുടരും. ജിദ്ദയുടെ പടിഞ്ഞാറന്‍ തീരത്തും ശീതക്കാറ്റിന്റെ സ്വാധീനം മൂലം താപനിലയിലും ഗണ്യമായ കുറവുണ്ടാകും.

    റിയാദ്, മക്ക, കിഴക്കന്‍ പ്രവിശ്യ, വടക്കന്‍ അതിര്‍ത്തി പ്രദേശങ്ങള്‍ എന്നിവിടങ്ങളിൽ മഴയുണ്ടാകുമെന്ന് സഊദി കാലവസ്ഥാ കേന്ദ്രങ്ങളും മുന്നറിയിപ്പ് നൽകി. റിയാദില്‍ പുലര്‍ച്ചെ മുതല്‍ മഴ തുടരുകയാണ്. അല്‍ഖര്‍ജ്, ദര്‍ഇയ, ദിലം, താദിഖ്, ഹുറൈമലാ, റുമാ എന്നിവിടങ്ങളില്‍ ഇന്ന് മഴയുണ്ടാകും. കൂടാതെ, അല്‍ദവാമി, ഹൊതാത് സുദൈര്‍, അല്‍ മജ്മഅ, അല്‍ സുല്‍ഫി മേഖലകളില്‍ ഞായറാഴ്ച വരെ ശക്തമായ ഇടിമിന്നലിനും സാധ്യതയുണ്ട്. വൈകുന്നേരം മുതല്‍ പുലര്‍ച്ചെ വരെയാണ് മഴ സാധ്യത. റിയാദിന്റെ തെക്കന്‍ മേഖലകളില്‍ ഇടിമിന്നലോടെയുള്ള മഴ ഇന്ന് ശക്തിപ്പെടാം.

     കിഴക്കന്‍ പ്രവിശ്യയില്‍ ഖഫ്ജി, നഈരിയ, ഹഫറല്‍ ബാത്തിന്‍, ഖര്‍യതുല്‍ ഉല്‍യാ എന്നിവിടങ്ങളില്‍ മഴയും അല്‍ഹസാ, ജുബൈല്‍, ദമാം, ഖത്തീഫ് എന്നിവിടങ്ങളില്‍ ആലിപ്പഴ വര്‍ഷത്തോടൊപ്പം മഴയുമുണ്ടാകും. മക്ക പ്രവിശ്യയില്‍ ഖുര്‍മ, അല്‍മോയ, തുര്‍ബ, മൈസാന്‍, വടക്കന്‍ പ്രവിശ്യയില്‍ റഫ, അറാര്‍ എന്നിവിടങ്ങളില്‍ ഇടിമിന്നലോടെയാണ് മഴയുണ്ടാകും. സുരക്ഷയുടെ ഭാഗമായി രാജ്യത്തെ ചുരം പാതകളും അപകട സാധ്യതയുള്ള റോഡുകളും അധികൃതർ താത്കാലികമായി അടച്ചിട്ടുണ്ട്.

    സഊദി അറേബ്യയെ കൂടാതെ, ഖത്തർ, കുവൈത്, ബഹ്‌റൈൻ രാജ്യങ്ങളിലും ഒറ്റപ്പെട്ട ചാറ്റൽ മഴ ലഭിക്കുമെന്നും മെറ്റ് ബീറ്റ് വെതർ സർവീസ് റിപ്പോർട്ട് ചെയ്യുന്നു.