കല്‍പ്പറ്റ: നബാര്‍ഡിന് കീഴില്‍ പ്രവര്‍ത്തനമാരംഭിച്ച കാര്‍ഷികോല്‍പ്പാദന കമ്പനികളുടെ സംയുക്ത ആഭിമുഖ്യത്തില്‍ നടത്തുന്ന പ്രഥമ മലബാര്‍ അഗ്രിഫെസ്റ്റിനുള്ള ഒരുക്കങ്ങള്‍ പൂര്‍ത്തിയായി.
മേളയുടെ  ഔദ്യോഗിക ഉദ്ഘാടനം ഇന്ന് നടക്കുമെന്ന് സംഘാടക സമിതി ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു.
കല്‍പ്പറ്റ പുതിയ ബസ് സ്റ്റാന്റിനുള്ളിലാണ് 23 മുതല്‍ 28 വരെ അഗ്രിഫെസ്റ്റ് നടക്കുന്നത്. വൈകുന്നേരം 4.30ന് ജില്ലാ പഞ്ചായത്ത് പ്രസിഡന്റ് ടി ഉഷാകുമാരി അഗ്രിഫെസ്റ്റ് ഉദ്ഘാടനം ചെയ്യും. പ്രദര്‍ശന വിപണന സ്റ്റാളുകളുടെ ഉദ്ഘാടനം കല്‍പ്പറ്റ ബ്ലോക്ക് പഞ്ചായത്ത് വൈസ് പ്രസിഡന്റ് കെ.കെ ഹനീഫ നിര്‍വഹിക്കും.
കല്‍പ്പറ്റ മുനിസിപ്പല്‍ വൈസ് ചെയര്‍മാന്‍ പി.പി ആലി അധ്യക്ഷനാവും.
കര്‍ഷകരായ ചെറുവയല്‍ രാമന്‍, സുകുമാരന്‍, ഉണ്ണി മൂസദ്, ഷാജി എളപ്പുപാറ, അയൂബ് തോട്ടോളി എന്നിവര്‍ ചേര്‍ന്ന് വേദിയില്‍ ദീപം തെളിയിക്കും. തുടര്‍ന്ന് കേരളത്തിലെ 104 ഉല്‍പ്പാദക കമ്പനികളെ പ്രതിനിധാനം ചെയ്ത് 104 കര്‍ഷകര്‍ സദസില്‍ ദീപം തെളിയിക്കും.
മലബാര്‍ അഗ്രിഫെസ്റ്റിന്റെ ലോഗോ ഡിസൈന്‍ ചെയ്ത ആര്‍ട്ടിസ്റ്റ് എ ജില്‍സിനെ ചടങ്ങില്‍ ആദരിക്കും. ജനപ്രതിനിധികളും, ഉദ്യോഗസ്ഥ രാഷ്ട്രീയ പാര്‍ട്ടി പ്രതിനിധികളും പങ്കെടുക്കും. അഗ്രിഫെസ്റ്റിനോടനുബന്ധിച്ച് വിവിധ ഇനം തേനും തേനിന്റെ മൂല്യ വര്‍ധിത ഉല്‍പ്പന്നങ്ങളും സെമിനാറും ഉള്‍പ്പെടുത്തി ഹണിഫെസ്റ്റ്, ചക്ക ഉല്‍പ്പന്നങ്ങളെ പരിചയപ്പെടുത്തുന്ന ചക്കമഹോല്‍സവം, വിദ്യാഭ്യാസ ശാസ്ത്ര അറിവുകളെ അവതരിപ്പിക്കുന്ന നക്ഷത്ര ബംഗ്ലാവും വിദ്യാഭ്യാസ മേളയും ഉണ്ടാകും.  
വിവിധ വിത്തുകളുടെ പ്രദര്‍ശനം, കൈമാറ്റം, വില്‍പ്പന എന്നിവയ്ക്കായി പ്രത്യേക സൗകര്യവും ഒരുക്കിയിട്ടുണ്ട്. വിവിധ വിഷയങ്ങളെ ആസ്പദമാക്കി ദിവസവും സെമിനാറുകളും നടക്കും.
വാര്‍ത്താസമ്മേളനത്തില്‍ നബാര്‍ഡ് എ.ജി.എം എന്‍.എസ് സജികുമാര്‍, സ്വാഗതസംഘം ചെയര്‍മാന്‍ എം.കെ ദേവസ്യ, ജനറല്‍ കണ്‍വീനര്‍ സാബു പാലാട്ടില്‍ പങ്കെടുത്തു.