കരടിപ്പാറ: വൈദ്യുത തൂണില്‍ എഴുതുന്നതു സംബന്ധിച്ച് സി.പി.എം-ലീഗ്  പ്രവര്‍ത്തകര്‍ തമ്മിലുണ്ടായ തര്‍ക്കം സംഘര്‍ഷത്തില്‍ കലാശിച്ചു.
ഇന്നലെ രാവിലെ എട്ടു മണിയോടെ കരടിപ്പാറയിലാണ് സംഭവം. വൈദ്യുത തൂണില്‍ പെയിന്റടിച്ച് പേരെഴുതുന്നതുമായി ബന്ധപ്പെട്ട് ഇരു കൂട്ടരും തമ്മില്‍ വാക്ക് തര്‍ക്കം ഉണ്ടാവുകയും പിന്നീടത് സംഘര്‍ഷത്തില്‍ കാലാശിക്കുകയുമാണുണ്ടായതെന്നാണ് പൊലിസ് പറയുന്നത്.
സംഘര്‍ഷത്തില്‍ യൂത്ത് ലീഗ് പ്രവര്‍ത്തകരായ കരടിപ്പാറ ചേലപറമ്പില്‍ സി.എച്ച് നൗഫല്‍(36), പുളിക്കല്‍ നിഷാദ്(25), സി.പി.എം പ്രവര്‍ത്തകരായ കരടിപ്പാറ പൂവത്തുപറമ്പില്‍ പി.പി റഷീദ്(39), മകന്‍ റിന്‍ഷാദ്(17), മുള്ളത്ത്പറമ്പില്‍ എം.പി സിറാജ്(22), പിതാവ് സിദ്ദീഖ്(46), എടമഠത്തില്‍ ഇ.ആര്‍ അജ്മല്‍(19) എന്നിവര്‍ക്കാണ് പരുക്കേറ്റത്.
യൂത്ത് ലീഗ്പ്രവര്‍ത്തകനായ നൗഫലിന്റെ കഴുത്തില്‍ മുറിവേറ്റിട്ടുണ്ട്. ലീഗ് പ്രവര്‍ത്തകര്‍ സുല്‍ത്താന്‍ ബത്തേരി താലൂക്ക് ആശുപത്രിയിലും സി.പി.എം പ്രവര്‍ത്തകര്‍ അമ്പലവയല്‍ സി.എച്ച്.സിയിലും ചികിത്സയിലാണ്. സംഭവം അറിഞ്ഞെത്തിയ പൊലിസ് സ്ഥലത്ത് ക്യാംപ് ചെയ്യുന്നുണ്ട്.