ആലപ്പുഴ: അനധികൃത മദ്യവില്‍പനയുടെയും മയക്കുമരുന്ന് വിപണനവും വര്‍ധിച്ചതോടെ ജില്ലയില്‍ കഴിഞ്ഞ നാലു മാസത്തിനിടെ എക്‌സൈസ് വകുപ്പ് രജിസ്റ്റര്‍ ചെയ്തത് 868 കേസുകള്‍.
ആലപ്പുഴ ഡിവിഷനിലെ വിവിധ എക്‌സൈസ് ഓഫീസുകളുടെ നേതൃത്വത്തില്‍ നടത്തിയ 4,764 പരിശോധനയിലാണ് 868 അബ്കാരി കേസുകള്‍ രജിസ്റ്റര്‍ ചെയ്തത്.
ജില്ലാ കലക്ടര്‍ ആര്‍ ഗിരിജയുടെ അധ്യക്ഷതയില്‍ കലക്‌ട്രേറ്റില്‍ ചേര്‍ന്ന അനധികൃത മദ്യത്തിന്റെ ഉല്‍പാദനവും വിതരണവും തടയുന്നതിനുള്ള ജില്ലാതല ജനകീയ കമ്മിറ്റി യോഗത്തിലാണ് എക്‌സൈസ് വകുപ്പ് കണക്കുകള്‍ വ്യക്തമാക്കിയത്. 962 പേരാണ് പ്രതികളായത്. 59 എന്‍.ഡി.പി.എസ് കേസുകള്‍ രജിസ്റ്റര്‍ ചെയ്തു. 259 ലിറ്റര്‍ ചാരായം, 5,760 ലിറ്റര്‍ വാഷ്, 9,882 ലിറ്റര്‍ അരിഷ്ടം എന്നിവ പിടിച്ചെടുത്തു. 6.87 കിലോ കഞ്ചാവ്, രണ്ടു കഞ്ചാവ് ചെടികള്‍, 53 കഞ്ചാവ് വിത്തുകള്‍, 6,514 പായ്ക്കറ്റ് ഹാന്‍സ്,  10,251 പായ്ക്കറ്റ് സിഗററ്റ്, 235.7 കിലോ ഗ്രാം പുകയില ഉല്‍പ്പന്നങ്ങള്‍, മയക്കുമരുന്ന് ഇനത്തില്‍പ്പെട്ട 67 ലോറാസെപാം ടാബ്‌ലറ്റുകള്‍, 82 ലിറ്റര്‍ അനധികൃത മദ്യം തുടങ്ങിയവയും പിടിച്ചെടുത്തവയില്‍ ഉള്‍പ്പെടും. സ്‌കൂളുകള്‍ കേന്ദ്രീകരിച്ച് പ്ലസ്ടു വരെയുള്ള വിദ്യാര്‍ഥികളില്‍ ലഹരിവിരുദ്ധ ബോധവത്കരണത്തിനായി വിമുക്തി പദ്ധതി പുനര്‍ജ്ജീവിപ്പിക്കുമെന്ന് കലക്ടര്‍ പറഞ്ഞു. സ്റ്റുഡന്റ് പൊലിസ് കേഡറ്റ് ഉള്‍പ്പെടെയുള്ളവരെ സജീവമായി പദ്ധതിയില്‍ പങ്കാളികളാക്കും. കഴിഞ്ഞ ജനകീയ കമ്മിറ്റിക്കു ശേഷം 15,868 വാഹനങ്ങള്‍ പരിശോധിക്കുകയും നിയമവിരുദ്ധമായി കഞ്ചാവും മദ്യവും കടത്തിയതിന് 36 വാഹനങ്ങള്‍ പിടിച്ചെടുക്കുകയും ചെയ്തു. 56 മദ്യസാമ്പിളുകളും 1,615 കള്ളുസാമ്പിളുകളും ശേഖരിച്ചു.
 കള്ളു സാമ്പിള്‍ രാസ പരിശോധനയില്‍ വ്യതിയാനം കണ്ടെത്തിയതിനെ തുടര്‍ന്ന് ആറു ഗ്രൂപ്പ് കളളുഷാപ്പുകളുടെ ലൈസന്‍സ് റദ്ദാക്കി പുനര്‍ ലേലം ചെയ്തു. ഇതര സംസ്ഥാന തൊഴിലാളികള്‍ കൂട്ടമായി താമസിക്കുന്ന വാടക വീടുകള്‍, അമ്പലപ്പുഴ ഗവണ്‍മെന്റ് കോളജിന് സമീപത്തെ പ്രദേശങ്ങള്‍, ആലിശ്ശേരി ലോറി സ്റ്റാന്റ് തുടങ്ങിയ പ്രദേശങ്ങള്‍ കേന്ദ്രീകരിച്ച് നിരന്തരമായി പരിശോധന നടത്തി. അമ്പലപ്പുഴ ശ്രീകൃഷ്ണ സ്വാമി ക്ഷേത്രത്തിലേക്കുള്ള റോഡരുകില്‍ പ്രവര്‍ത്തിക്കുന്ന എഫ്.എല്‍ ഒന്ന് ഷോപ്പ് മാറ്റി സ്ഥാപിക്കുന്നതിനെ പറ്റിയുളള റിപ്പോര്‍ട്ട് എക്‌സൈസ് കമ്മിഷണര്‍ക്ക് നല്‍കിയിട്ടുള്ളതായി യോഗത്തില്‍ ഉദ്യോഗസ്ഥര്‍ അറിയിച്ചു. വിദ്യാര്‍ഥികള്‍ക്ക് പരാതികള്‍ അറിയിക്കാന്‍ 110 പരാതി പെട്ടികള്‍ സ്‌കൂളുകളില്‍ സ്ഥാപിച്ചിട്ടുണ്ട്.
എക്‌സൈസ് റെയ്ഡുകള്‍ നടത്തുന്ന ഉദ്യോഗസ്ഥര്‍ക്ക് പൊലിസിന്റെ ഭാഗത്തു നിന്ന് വേണ്ട സഹായം ചെയ്ത് നല്‍കണമെന്ന് ജില്ലാ കലക്ടര്‍ നിര്‍ദേശിച്ചു. യോഗത്തില്‍ വെളിയനാട് ബ്ലോക്ക് പഞ്ചായത്ത് പ്രസിഡന്റ് കോമളവല്ലി, അസിസ്റ്റന്റ് എക്‌സൈസ് കമ്മിഷണര്‍ കെ ചന്ദ്രപാല്‍, ഡി.വൈ.എസ്. പി.ഡി മോഹനന്‍,  വെളിയനാട് ബ്ലോക്ക് പഞ്ചായത്ത് അംഗം ആന്‍സമ്മാ മാത്യു,  അഡ്വ. റോജോ ജോസഫ്, ഹക്കിം മുഹമ്മദ് രാജ, കബീര്‍ പൊന്നാട്, പി.എന്‍ ഇന്ദ്രസേനന്‍, ബേബി പാറക്കാടന്‍, എം.എ ജോണ്‍ മാടവന സംസാരിച്ചു.