കൊച്ചി: ഇന്ത്യന്‍ സൂപ്പര്‍ ലീഗിന്റെ അഞ്ചാമത് പതിപ്പില്‍ കേരളത്തിന്റെ മഞ്ഞപ്പടക്കൊപ്പം നടന്‍ മോഹന്‍ലാലും. കേരള ബ്ലാസ്‌റ്റേഴ്‌സിന്റെ ബ്രാന്‍ഡ് അംബാസിഡറായി ഇന്നലെ നടന്ന ജഴ്‌സി അനാവരണ ചടങ്ങില്‍ മോഹല്‍ലാലും അണിനിരന്നു. മുഖ്യ കോച്ച് ഡേവിഡ് ജയിംസിന്റെ നേതൃത്വത്തില്‍ കേരള ബ്ലാസ്‌റ്റേഴ്‌സിന്റെ താരനിര പൂര്‍ണമായി അണിനിരന്ന ചടങ്ങില്‍ ബ്ലാസ്റ്റേഴിന്റെ ജഴ്‌സിയണിഞ്ഞാണ് മോഹന്‍ലാല്‍ വേദിയിലേക്ക് കടന്നുവന്നത്.

ഫുട്‌ബോള്‍ ഇഷ്ടപ്പെടുകയും കളിക്കുകയും ചെയ്തിരുന്ന തനിക്ക് പുതിയ ദൗത്യം വലിയ ഉത്തരവാദിത്വമായാണ് അനുഭവപ്പെടുന്നതെന്ന് മോഹന്‍ലാല്‍ വ്യക്തമാക്കി.
കേരള ബ്ലാസ്‌റ്റേഴ്‌സിന്റെ ദുരിതാശ്വാസ പ്രവര്‍ത്തനങ്ങളെ പ്രശംസിച്ച മോഹന്‍ലാല്‍, എപ്പോഴും കൂടെയുണ്ടാകുമെന്ന ഉറപ്പും നല്‍കിയാണ് മഞ്ഞപ്പടക്ക് ആവേശം നല്‍കിയത്. കഴിഞ്ഞ സീസണില്‍ നിന്ന് തീര്‍ത്തും വ്യത്യസ്തമായ ടീമാണ് ഇത്തവണത്തേതെന്നും വളരെ പ്രതീക്ഷകള്‍ നല്‍കുന്നതായിരിക്കും ബ്ലാസ്റ്റേഴ്‌സിന്റെ പ്രകടനമെന്നും ഡേവിഡ് ജയിംസ് പറഞ്ഞു.
സച്ചിന്റെ അഭാവത്തില്‍ മോഹന്‍ലാലിന്റെ കടന്നുവരവ് കൂടുതല്‍ ആവേശം നല്‍കുന്നതാണെന്നും ഇത്തവണ കൂടുതല്‍ മികവ് ടീമിന് പുറത്തെടുക്കാന്‍ കഴിയുമെന്നും ടീം ഉടമ പ്രസാദ് വ്യക്തമാക്കി. ടീമിന്റെ സ്‌പോണ്‍സര്‍മാരും ഒഫീഷ്യല്‍സും പങ്കെടുത്ത ചടങ്ങില്‍ മോഹന്‍ലാല്‍ ടീമിന്റെ പുതിയ ജഴ്‌സി അനാവരണം ചെയ്തു.