ഡിട്രോയിറ്റ്: കാര്‍ നിര്‍മാണ മേഖലയിലെ അതികായന്‍മാരായ ഫോര്‍ഡ് ചീഫ് എക്‌സിക്യൂട്ടീവ് ഓഫിസര്‍(സി.ഇ.ഒ) മാര്‍ക് ഫീല്‍ഡ്‌സിനെ പിരിച്ചുവിടുന്നു. നിക്ഷേപകരുടെ താല്‍പര്യമില്ലായ്മയും അടുത്തിടെ കമ്പനിയുടെ വ്യാപാരത്തില്‍ വന്ന ഇടിവുമാണ് ഫീല്‍ഡ്‌സിനെ മാറ്റുന്നതിന് കാരണം. 

കമ്പനി വരും വര്‍ഷങ്ങളില്‍ പുറത്തിറക്കാന്‍ ഉദ്ദേശിക്കുന്ന വാഹനങ്ങളും അവയുടെ കാര്യക്ഷമതയും ഉറപ്പുവരുത്താന്‍ ഫീല്‍ഡ്‌സിന് സാധിക്കില്ലെന്ന് നിക്ഷേപകര്‍ ഫോര്‍ഡ് അധികൃതരെ അറിയിച്ചിട്ടുണ്ട്. ഡ്രൈവര്‍ രഹിത വാഹനങ്ങള്‍ വികസിപ്പിക്കുന്നതിലാണ് കമ്പനിയുടെ ശ്രദ്ധ. ഫീല്‍ഡ്‌സിന് പകരം ജിം ഹാക്കെറ്റ് സി.ഇ.ഒ സ്ഥാനം ഏറ്റെടുക്കും. കമ്പനിയുടെ സ്മാര്‍ട്ട് മൊബിലിറ്റി യൂനിറ്റിന്റെ ചുമതലയാണ് ഹാക്കെറ്റ് വഹിക്കുന്നത്. ഈ വിഭാഗത്തിലാണ് ഡ്രൈവര്‍ രഹിത വാഹനങ്ങള്‍ നിര്‍മിക്കുന്നത്. കമ്പനിയുടെ എക്‌സിക്യൂട്ടീവ് ചെയര്‍മാന്‍ ബില്‍ ഫോര്‍ഡ് ജൂനിയര്‍ ഈ പദ്ധതിയെ അഭിനന്ദിച്ചിട്ടുണ്ട്.