ലഖ്‌നൗ: ഉത്തര്‍പ്രദേശില്‍ സ്ത്രീകള്‍ക്ക് നേരെയുള്ള ലൈംഗിക അതിക്രമങ്ങള്‍ സംബന്ധിച്ച വാര്‍ത്തകള്‍ക്ക് കുറവില്ല.
മരുമകളെ ബലാത്സംഗം ചെയ്യുകയും എതിര്‍ത്ത മകനെ വെടിവച്ചുകൊല്ലുകയുംചെയ്ത സംഭവമാണ് ഏറ്റവും പുതിയത്. ബറേലിയിലാണ് സംഭവം. പരാതിയില്‍ 55കാരനെതിരേ ബലാത്സംഗം, കൊലപാതകം തുടങ്ങിയ വകുപ്പുകള്‍ പ്രകാരം കേസെടുത്തു. ഈ മാസം 25ന് വീട്ടില്‍ തനിച്ചായിരിക്കുമ്പോള്‍ ഭര്‍തൃപിതാവ് പീഡിപ്പിച്ചെന്നായിരുന്നു യുവതിയുടെ പരാതി. ഭര്‍ത്താവും ബന്ധുക്കളും അടുത്ത നഗരത്തില്‍ വിവാഹച്ചടങ്ങില്‍ പങ്കെടുക്കാന്‍ പോയ സമയത്താണ് പ്രതി തന്റെ മൂത്തമകന്റെ ഭാര്യയെ പീഡിപ്പിച്ചത്. വിഷയം അറിഞ്ഞ യുവതിയുടെ ഭര്‍ത്താവ്, ഇക്കാര്യം ശനിയാഴ്ച രാവിലെ പിതാവിനോടും മാതാവിനോടും സംസാരിച്ചിരുന്നു. വിഷയത്തില്‍ പൊലിസില്‍ പരാതിനല്‍കുമെന്നും അറിയിച്ചു. ഇതോടെ തര്‍ക്കമാവുകയും ഒടുവില്‍ തോക്കെടുത്ത് മകനെ വെടിവച്ചുകൊല്ലുകയുമായിരുന്നുവെന്ന് പൊലിസ് പറഞ്ഞു.