കോഴിക്കോട്: നഗരത്തില്‍ സ്ഥിരമായി കഞ്ചാവ് എത്തിക്കുന്ന യുവാവിനെ 1.200 കിലോ കഞ്ചാവുമായി എക്‌സൈസ് സംഘം പിടികൂടി. പെരിന്തല്‍മണ്ണ മൂച്ചികൂട്ടത്തില്‍ ഷമീര്‍ എന്ന എം.കെ ജിജേഷിനെ (32) ആണ് പിടികൂടിയത്. കണ്ടംകുളം പുതിയപാലം റോഡില്‍ ചാലപ്പുറം എന്‍.എസ്.എസ് ഇംഗ്ലിഷ് മീഡിയം സ്‌കൂളിനു മുന്‍വശത്തുവച്ചാണു പിടികൂടിയത്.
കോഴിക്കോട് എക്‌സൈസ് എന്‍ഫോഴ്‌സ്‌മെന്റ് ആന്‍ഡ് ആന്റി നാര്‍ക്കോട്ടിക് സ്‌പെഷല്‍ സ്‌ക്വാഡിലെ സര്‍ക്കിള്‍ ഇന്‍സ്‌പെക്ടര്‍ പി. സജിത്ത് കുമാറും പാര്‍ട്ടിയും ചേര്‍ന്നാണ് ഇയാളെ പിടികൂടിയത്. ഇയാളില്‍നിന്ന് കഞ്ചാവിനു പുറമെ പള്‍സര്‍ ബൈക്കും നിക്കോണ്‍ ഡി 90 കാമറയും പിടികൂടി. തമിഴ്‌നാട്ടിലെ പളനി ഒട്ടസത്രം ഭാഗങ്ങളില്‍ നേരിട്ടു പോയാണ് കഞ്ചാവ് എത്തിക്കുന്നത്. ടൂറിസ്റ്റുകളുടെ വേഷത്തില്‍ സഞ്ചരിക്കുകയും ചെറുപ്പക്കാരുടെ ഇടയില്‍ ന്യൂ ജെന്‍ മയക്കുമരുന്നുകള്‍ എത്തിക്കുകയും ചെയ്യുന്നതാണു രീതി.
കോഴിക്കോട്, മലപ്പുറം ഭാഗങ്ങളില്‍ ചെറുപ്പക്കാരെ ഗോവയിലും കൊടൈക്കനാലിലും ഡി ജെ പാര്‍ട്ടികളില്‍ എത്തിക്കുന്ന പ്രധാന കണ്ണികൂടിയാണ് ജിജേഷ്.
എക്‌സൈസ് ഇന്‍സ്‌പെക്ടര്‍ എം.കെ ഗിരീഷിന്റെ നേതൃത്വത്തില്‍ കഴിഞ്ഞ മൂന്നു മാസങ്ങളായി നടത്തിവന്ന നിരീക്ഷണത്തിന്റെ ഫലമായാണ് അറസ്റ്റ്. റെയ്ഡില്‍ പ്രിവന്റിവ് ഓഫിസര്‍ കെ.പി റഷീദ്, സിവില്‍ എക്‌സൈസ് ഓഫിസര്‍ യോഗേഷ് ചന്ദ്ര, ഡ്രൈവര്‍ ഒ.ടി മനോജ് എന്നിവരും പങ്കെടുത്തു.