ഒറ്റപ്പാലം: ബ്ലോക്ക് പഞ്ചായത്ത് വനിതാ കാന്റീനില്‍ പാചകവാതക ഗ്യാസ് സിലിണ്ടര്‍ ചോര്‍ന്ന് തീപടര്‍ന്നത് ഭീതിപരത്തി. പലഹാരങ്ങള്‍ പാകംചെയ്യുന്നതിനിടെയാണ് തീപടര്‍ന്നത്. ഇന്നലെ ഉച്ചയ്ക്ക് മൂന്നുമണിയോടെയാണ് സംഭവം. സിലിണ്ടറില്‍ നിന്ന് ശബ്ദം കേള്‍ക്കുകയും തീപടരുകയും കണ്ടപാടെ തൊഴിലാളികള്‍ കാന്റ്റീനില്‍നിന്ന് മാറുകയും ഗ്യാസ് ഏജന്‍സി അധികൃതരെ വിവരമറിയിക്കുകയും ചെയ്തു.
ഗ്യാസ് ഏജന്‍സി അധികൃതര്‍ സമയത്തിനെത്തി തീയണച്ചതിനാല്‍ വന്‍ അപകടം ഒഴിവായി. വെള്ളമൊഴിച്ച് തീകെടുത്തുകയും സിലിണ്ടര്‍ പുറത്തേക്കെത്തിച്ച് നനച്ച ചാക്കുകൊണ്ട് പൊതിയുകയും ചെയ്തു. ഷൊര്‍ണ്ണൂര്‍ അഗ്‌നിരക്ഷാ സേനാംഗങ്ങള്‍ എത്തിയപ്പോഴേക്കും തീ അണച്ചിരുന്നു.