തലശേരി: മൂന്നംഗസംഘം വ്യാപാരിയെ അക്രമിച്ച് അരക്കിലോ സ്വര്‍ണം കവര്‍ന്നു. തലശേരി മഠപ്പുര റോഡില്‍ ഭുവനേശ്വരി വീട്ടില്‍ താമസിക്കുന്ന മഹാരാഷ്ട്ര സാംഗ്ലി സ്വദേശി ശ്രീകാന്ത് കദ(30)മിന്റെ സ്വര്‍ണക്കട്ടികളാണ് അക്രമികള്‍ കവര്‍ന്നത്. തലശേരി എ.വി.കെ നായര്‍ റോഡില്‍ സോന ജ്വല്ലറി ഉടമയാണ് ഇദ്ദേഹം.
പഴയ സ്വര്‍ണാഭരണങ്ങള്‍ വാങ്ങി ഉരുക്കി സ്വര്‍ണക്കട്ടികളാക്കി വില്‍പന നടത്തുന്നയാളാണ് ശ്രീകാന്ത്. ഇന്നലെ രാവിലെ 10.45ഓടെ തലശേരി മേലൂട്ട് ക്ഷേത്രത്തിനു സമീപത്ത് ടി.സി മുക്കില്‍ വച്ച് ഹെല്‍മറ്റ് ധരിച്ച് ബൈക്കിലെത്തിയ സംഘം ഇയാളെ അക്രമിക്കുകയായിരുന്നു.
ശ്രീകാന്ത് സഞ്ചരിച്ച സ്‌കൂട്ടറിനു കുറുകെ ബൈക്ക് നിര്‍ത്തി വടികൊണ്ട് തലയ്ക്കടിച്ച് വീഴ്ത്തി കവര്‍ച്ച നടത്തി രക്ഷപ്പെടുകയായിരുന്നു. തലശേരി എസ്.ഐ ഹരീഷിന്റെ നേതൃത്വത്തില്‍ തെളിവെടുപ്പ് നടത്തി. സമീപത്തെ സി.സി.ടി.വി ദൃശ്യങ്ങള്‍ കേന്ദ്രീകരിച്ച് പൊലിസ് അന്വേഷണം ആരംഭിച്ചു.
തലശേരി മേഖലയില്‍ ഇത്തരം സംഭവങ്ങള്‍ വ്യാപകമാകുകയാണ്. ഏതാനും ദിവസം മുന്‍പ് തലശ്ശേരി ഗുഡ്‌സ്‌ഷെഡ് റോഡിനു സമീപത്ത് വച്ച് വ്യാപാരിയായെ എ.കെ സക്കരിയയുടെ നിര്‍ത്തിയിട്ട സ്‌കൂട്ടറില്‍ നിന്നു 11 ലക്ഷം രൂപ കവര്‍ന്നിരുന്നു. സംഭവത്തില്‍ പ്രതികളെ ആരെയും പിടികൂടാന്‍ പൊലിസിനു കഴിഞ്ഞിട്ടില്ല.