കാട്ടിലങ്ങാടി: പി.എം.എസ്.എ യതീംഖാനയില്‍ പൂക്കോയ തങ്ങള്‍ അനുസ്മരണ വാഫി സനദ് ദാന മഹാസമ്മേളനത്തിന് ഇജ്ജ്വല സമാപ്തി. 'സ്‌നേഹമായ്, വെളിച്ചമായ്, നാലു പതിറ്റാണ്ടുകള്‍' എന്ന പ്രമേയത്തില്‍ രണ്ടുദിവസങ്ങളിലായി വിവിധ സെഷനുകളിലായാണ് സമ്മേളനം നടന്നത്.
ഇന്നലെ നടന്ന വാഫി സനദ് ദാന സമ്മേളനം പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്തു. പഠനം പൂര്‍ത്തിയാക്കിയ 122 വാഫി പണ്ഡിതര്‍ക്കുള്ള സനദ് ദാനവും തങ്ങള്‍ നിര്‍വഹിച്ചു.
ഇസ്‌ലാമിന്റെ ജീവനാണ് അറിവെന്നും ദീനിനെ നിലനിര്‍ത്തുന്നതു തന്നെ അതാണെന്നും തങ്ങള്‍ പറഞ്ഞു. സമസ്ത ജന. സെക്രട്ടറി കെ. ആലിക്കുട്ടി മുസ്‌ലിയാര്‍ അധ്യക്ഷനായി. മന്ത്രി കടന്നപ്പള്ളി രാമചന്ദ്രന്‍ മുഖ്യാതിഥിയായി. സി.ഐ.സി കോ ഓഡിനേറ്റര്‍ അബ്ദുല്‍ഹഖീം ഫൈസി ആദൃശേരി വാഫി സനദ് ദാന ആമുഖ ഭാഷണം നടത്തി.
സമസ്ത മുശാവറ അംഗങ്ങളായ എ. മരക്കാര്‍ മുസ്‌ലിയാര്‍, ആദൃശേരി ഹംസക്കുട്ടി മുസ്‌ലിയാര്‍, എം.പി മുസ്തഫല്‍ ഫൈസി, ഒ.ടി മൂസ മുസ്‌ലിയാര്‍, എം.എല്‍.എമാരായ എന്‍. ശംസുദ്ദീന്‍, സി. മമ്മൂട്ടി, ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ സംബന്ധിച്ചു.
സമ്മേളനത്തോടനുബന്ധിച്ച് പാണക്കാട് സയ്യിദ് മുഹമ്മദലി ശിഹാബ് തങ്ങള്‍ വനിതാ കോളജിന് പുതിയ കെട്ടിടം സമര്‍പ്പിച്ചു. കോളജ് കാംപസില്‍ നടന്ന ചടങ്ങ് പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്തു.