പനജി: ഐ.എസ്.എല്ലില്‍ സമനിലക്കളി തുടരുന്നു. ഇന്നലെ നടന്ന മത്സരവും സമനിലയില്‍ കലാശിച്ചതോടെ അവസാനമായി നടന്ന നാല് മത്സരവും സമനിലയിലായി. ഇന്നലെ നടന്ന ഗോവ - നോര്‍ത്ത് ഈസ്റ്റ് യുനൈറ്റഡ് മത്സരമാണ് 1-1 എന്ന സ്‌കോറിന് സമനിലയില്‍ കലാശിച്ചത്. 40ാം മിനുട്ടില്‍ പെനാല്‍റ്റിയില്‍ നിന്ന് ഇദ്‌രീസ നോര്‍ത്ത് ഈസ്റ്റ് യുനൈറ്റഡിന് വേണ്ടി ആദ്യ ഗോള്‍ നേടി. എന്നാല്‍ അധികം വൈകാതെ ഇഗോര്‍ അങ്കോളോയിലൂടെ ഗോള്‍ തിരിച്ചടിച്ച് ഗോവ സമനില പിടിച്ചു. 76 ശതമാനം പന്ത് കൈവശം വെച്ച് കളിച്ചിട്ടും ഗോവക്ക് ഗോള്‍ കണ്ടെത്താന്‍ കഴിഞ്ഞില്ല. അവസാനമായി നടന്ന കേരളാ ബ്ലാസ്റ്റേഴ്‌സ് - ചെന്നൈയിന്‍, ജംഷഡ്പുര്‍ - ഒഡിഷ, ബംഗളൂരു - ഹൈരാബാദ് മത്സരങ്ങള്‍ സമനിലയില്‍ കലാശിച്ചിരുന്നു. ഇന്ന് രാത്രി 7.30ന് നടക്കുന്ന മത്സരത്തില്‍ മുംബൈ സിറ്റി എഫ്.സി ഈസ്റ്റ് ബംഗാളിനെ നേരിടും. മൂന്ന് മത്സരത്തില്‍ നിന്ന് അഞ്ച് പോയിന്റുള്ള നോര്‍ത്ത് ഈസ്റ്റ് യുനൈറ്റഡ് പട്ടികയില്‍ രണ്ടാം സ്ഥാനത്താണിപ്പോള്‍. മൂന്ന് മത്സരത്തില്‍ നിന്ന് രണ്ട് പോയിന്റുള്ള ഗോവ പട്ടികയില്‍ ഏഴാം സ്ഥാനത്തും തുടരുന്നു.