ന്യൂഡല്‍ഹി: കര്‍ഷക സമരം അടിച്ചമര്‍ത്താനുള്ള കേന്ദ്ര നിലപാടിനെതിരെ ആഞ്ഞടിച്ച് കോണ്‍ഗ്രസ് നേതാവ് രാഹുല്‍ ഗാന്ധി. ലാത്തി കൊണ്ട് തല്ലിച്ചതച്ചല്ല ആവശ്യം അംഗീകരിച്ചു കൊണ്ടാണ് കര്‍ഷകരോടുള്ള കടപ്പാട് വീട്ടേണ്ടതെന്ന് അദ്ദേഹം തുറന്നടിച്ചു.

അന്നദാതാക്കള്‍ തെരുവില്‍ പ്രതിഷേധിക്കുമ്പോള്‍ കള്ളം ടിവിയില്‍ പ്രസംഗിക്കുകയാണെന്ന് അദ്ദേഹം ട്വിറ്ററില്‍ കുറിച്ചു.

കേന്ദ്രം പാസാക്കിയ കാര്‍ഷിക നയം പിന്‍വലിക്കണമെന്നാവശ്യപ്പെട്ട് ആറ് ദിവസമായി കര്‍ഷകര്‍ തെരുവില്‍ പ്രതിഷേധിച്ച് കൊണ്ടിരിക്കുകയാണ്.

'നമ്മുടെ അന്നദാതാക്കള്‍ തെരുവുകളില്‍ പ്രതിഷേധിച്ച് കൊണ്ടിരിക്കുകയാണ്, അതേസമയം അപ്പുറത്ത് കള്ളം ടിവിയില്‍ പ്രസംഗിച്ചു കൊണ്ടിരിക്കുന്നു.

കര്‍ഷകരുടെ കഠിനാധ്വാനത്തോട് നമുക്കെല്ലാര്‍ക്കും കടപ്പാടുണ്ട്. അവര്‍ക്ക് ന്യായം ലഭ്യമാക്കിയും അവരുടെ ആവശ്യങ്ങള്‍ അംഗീകരിച്ചുമാണ് ഈ കടപ്പാട് വീട്ടേണ്ടത്. അല്ലാതെ അവരെ ലാത്തിയുപയോഗിച്ച് തല്ലിച്ചതച്ചും കണ്ണീര്‍ വാതകം പ്രയോഗിച്ചുമല്ല.

ഉണരൂ, അഹങ്കാരത്തിന്റെ കസേരയില്‍ നിന്നും എഴുന്നേറ്റ് ചിന്തിക്കൂ. കര്‍ഷകര്‍ക്ക് അവരുടെ അവകാശം ല്‍കൂ,' രാഹുല്‍ ട്വീറ്റ് ചെയ്തു.

अन्नदाता सड़कों-मैदानों में धरना दे रहे हैं,
और
‘झूठ’ टीवी पर भाषण!

किसान की मेहनत का हम सब पर क़र्ज़ है।

ये क़र्ज़ उन्हें न्याय और हक़ देकर ही उतरेगा, न कि उन्हें दुत्कार कर, लाठियाँ मारकर और आंसू गैस चलाकर।

जागिए, अहंकार की कुर्सी से उतरकर सोचिए और किसान का अधिकार दीजिए।

— Rahul Gandhi (@RahulGandhi) December 1, 2020

കര്‍ഷക സമരം കേന്ദ്രത്തിന് തലവേദന ആയിരിക്കുകയാണ്. തിരക്കിട്ട് ചര്‍ച്ചകള്‍ നടത്തി കര്‍ഷക പ്രതിഷേധം അവസാനിപ്പിക്കാനുള്ള ശ്രമത്തിലാണ് കേന്ദ്ര സര്‍ക്കാര്‍. രാജ്‌നാഥ് സിങ്ങും നരേന്ദ്ര തോമറുമാണ് ചര്‍ച്ചക്ക് വിളിച്ചിരിക്കുന്നത്.

നിലവില്‍ 32 കര്‍ഷക സംഘങ്ങളെ മാത്രമാണ് സര്‍ക്കാര്‍ ചര്‍ച്ചക്ക് വിളിച്ചിരിക്കുന്നത്. 500 ല്‍ അധികം സംഘങ്ങളുള്ളപ്പോള്‍ വെറും 32 സംഘങ്ങളെ മാത്രം ചര്‍ച്ചക്ക് വിളിച്ചത് ശരിയായ നടപടിയല്ലെന്നും എല്ലാ കര്‍ഷക സംഘങ്ങളെയും ചര്‍ച്ചക്ക് വിളിക്കണമെന്നുമാണ് കര്‍ഷകര്‍ ആവശ്യപ്പെട്ടിരിക്കുന്നത്.

നേരത്തെ ഡിസംബര്‍ മൂന്നിനായിരുന്നു കര്‍ഷകരുമായി ചര്‍ച്ച നടത്താന്‍ സര്‍ക്കാര്‍ തീരുമാനിച്ചിരുന്നത്. എന്നാല്‍ കര്‍ഷക സമരം ശക്തിപ്പെടുന്ന സാഹചര്യത്തില്‍ ഡിസംബര്‍ ഒന്നിന് തന്നെ ചര്‍ച്ച നടത്താമെന്ന് സര്‍ക്കാര്‍ പറയുകയായിരുന്നു.

അതിനിടെ, സമരത്തിന് ഐക്യദാര്‍ഢ്യം പ്രഖ്യാപിച്ചുകൊണ്ട് സമരസ്ഥലത്തേക്ക് എത്തുന്ന കര്‍ഷകരുടെ എണ്ണം ദിനംപ്രതി കൂടിക്കൊണ്ടിരിക്കുകയാണ്. ശക്തമായ തണുപ്പിനെ പോലും വകവെക്കാതെയാണ് കര്‍ഷകര്‍ സമരത്തില്‍ പങ്കെടുക്കുന്നത്.