കൊച്ചി: പെരുമ്പടത്ത് ആണ്‍കുട്ടികളെ ലൈംഗികമായി പീഡിപ്പിക്കാന്‍ ശ്രമിച്ച വൈദികന്‍ അറസ്റ്റില്‍. ജെറി എന്നു വിളിക്കുന്ന ഫാദര്‍ ജോര്‍ജാണ് അറസ്റ്റിലായത്. ഇയാള്‍ ഡയറക്ടറായ സ്ഥാപനത്തിലെ കുട്ടികളെ ലൈംഗികമായി പീഡിപ്പിച്ചുവെന്നാണ് പരാതി.

പെരുമ്പടത്തെ ബോയ്‌സ് ഹോമിലെ കുട്ടികളെ കഴിഞ്ഞ കുറച്ചുകാലമായി ഇയാള്‍ ലൈംഗികമായി പീഡിപ്പിക്കുകയായിരുന്നു. എന്നാല്‍ പേടിമൂലം കുട്ടികള്‍ ഇക്കാര്യം പുറത്തു പറഞ്ഞിരുന്നില്ല. ഇന്നലെ രാത്രിയും ഇത്തരത്തില്‍ ലൈംഗികാക്രമണ ശ്രമമുണ്ടായി. ഇതേത്തുടര്‍ന്ന് ബോയ്‌സ് ഹോമിലുണ്ടായിരുന്ന ആറ് കുട്ടികള്‍ അവിടെ നിന്ന് പുറത്തേക്ക് ഇറങ്ങിയോടി. ഇവര്‍ വഴിയില്‍വെച്ച് ഒരാളുടെ ഫോണ്‍ വാങ്ങി വീട്ടിലേക്ക് വിളിച്ച് വിവരം അറിയിച്ചു. തുടര്‍ന്ന് രക്ഷിതാക്കളെത്തി നാട്ടുകാരെ വിവരം അറിയിക്കുകയും നാട്ടുകാരും രക്ഷിതാക്കളും ചേര്‍ന്ന് വൈദികനെ പള്ളുരുത്തി പൊലിസ് സ്റ്റേഷനില്‍ എത്തിക്കുകയുമായിരുന്നു.

വൈദികനെതിരെ പൊലിസ് കേസെടുത്തിട്ടുണ്ട്. ഇയാളെ കോടതിയില്‍ ഹാജരാക്കി റിമാന്‍ഡ് ചെയ്തിരിക്കുകയാണ്. പോക്‌സോ ഉള്‍പ്പെടെയുള്ള കുറ്റങ്ങളാണ് ഇയാള്‍ക്കെതിരെ ചുമത്തിയത്.