കൊച്ചി: ബന്ധു നിയമന വിവാദത്തില്‍ അഴിമതി നിരോധന നിയമപ്രകാരം കേസെടുക്കാന്‍ എന്തു നേട്ടമാണ് മുന്‍മന്ത്രി ഇ.പി ജയരാജനടക്കമുള്ളവര്‍ ഉണ്ടാക്കിയതെന്ന് വ്യക്തമാക്കി അന്വേഷണ ഉദ്യോഗസ്ഥന്‍ റിപ്പോര്‍ട്ട് നല്‍കണമെന്നു ഹൈക്കോടതി.
കേസില്‍ അന്വേഷണ ഉദ്യോഗസ്ഥന്‍ നല്‍കിയ വിശദീകരണ പത്രിക തൃപ്തികരമല്ലെന്നും ഹൈക്കോടതി വ്യക്തമാക്കി. ഇ.പി ജയരാജന്‍ വ്യവസായ മന്ത്രിയായിരിക്കെ ബന്ധുവായ സുധീര്‍ നമ്പ്യാരെ കേരള സ്റ്റേറ്റ് ഇന്‍ഡസ്ട്രിയല്‍ എന്റര്‍പ്രൈസസ് ലിമിറ്റഡിന്റെ എം.ഡിയായി നിയമിച്ചതാണ് കേസിനടിസ്ഥാനം.
പൊതുസേവകര്‍ സാമ്പത്തിക നേട്ടമോ മറ്റു വിലപ്പെട്ട ആനുകൂല്യമോ നേടിയാലാണ് അഴിമതി നിരോധന നിയമപ്രകാരം കേസെടുക്കാന്‍ കഴിയുക. ഇവിടെ നിയമന ഉത്തരവിറങ്ങി മൂന്നു ദിവസത്തിനുള്ളില്‍ റദ്ദാക്കിയ സാഹചര്യത്തില്‍ ജയരാജനടക്കമുള്ളവര്‍ എന്തു നേട്ടമാണ് ഉണ്ടാക്കിയതെന്ന് അന്വേഷണ ഉദ്യോഗസ്ഥന്‍ വ്യക്തമാക്കണം- ഇടക്കാല ഉത്തരവില്‍ പറയുന്നു.
ബന്ധു നിയമനവുമായി ബന്ധപ്പെട്ട വിജിലന്‍സ് കേസ് റദ്ദാക്കാന്‍ ഇ.പി ജയരാജന്‍ നല്‍കിയ ഹരജിയിലാണ് ഹൈക്കോടതിയുടെ ഇടക്കാല ഉത്തരവ്. ഹരജി മെയ് 30ന് വീണ്ടും പരിഗണിക്കും.