കായംകുളം: കാറിലെത്തിയ സംഘം കെ.എസ്.ആര്‍.ടി ഡ്രൈവറെ ബസ്സ്റ്റാന്റില്‍ കയറി മര്‍ദിച്ചു. മാനന്തവാടിയില്‍നിന്ന് തിരുവനന്തപുരത്തേക്ക് വരികയായിരുന്ന സൂപ്പര്‍ഫാസ്റ്റിന്റെ ഡ്രൈവര്‍ സേതുരാജനാണ് മര്‍ദനമേറ്റത്.ഇയാളെ കായംകുളം താലൂക്കാശുപത്രിയില്‍ പ്രവേശിപ്പിച്ചു.
   ചൊവ്വാഴ്ച രാത്രിയിലായിരുന്നു സംഭവം. തിരുവനന്തപുരത്തേക്ക് വരികയായിരുന്ന സൂപ്പര്‍ഫാസ്റ്റ് പുന്നപ്രയില്‍ വെച്ച് കൊറ്റുകുളങ്ങര സ്വദേശികള്‍ സഞ്ചരിച്ചിരുന്ന ഫോര്‍ രജിസ്‌ട്രേഷന്‍ കാറില്‍ തട്ടിയെന്നാരോപിച്ചായിരുന്നു മര്‍ദനം.ബസിനെ പിന്തുടര്‍ന്നെത്തിയ കാറിലുണ്ടായിരുന്നവര്‍ കായംകുളം ബസ്സ്റ്റാന്റിലെത്തി ഡ്രൈവറുമായി വാക്കേറ്റമുണ്ടാകുകയും തുടര്‍ന്ന് മര്‍ദിക്കുകയുമായിരുന്നു. ഈ സമയം അവിടെയെത്തിയ പട്രോളിംഗ് പോലീസ്  കാര്‍ കസ്റ്റഡിയില്‍ എടുത്തു. സംഭവത്തെ തുടര്‍ന്ന് സൂപ്പര്‍ഫാസ്റ്റിന്റെ ട്രിപ്പ് മുടങ്ങിയതോടെ രാത്രിയില്‍ യാത്രക്കാര്‍ വലഞ്ഞു.പിന്നീട് മറ്റുബസുകളിലായി യാത്രക്കാരെ കയറ്റിവിടുകയായിരുന്നു.