ബംഗളുരു: സഖ്യസര്‍ക്കാരിനെ പ്രതിസന്ധിയിലാക്കി രാജിവച്ച മുഴുവന്‍ എം.എല്‍.എമാര്‍ക്കും മന്ത്രി സ്ഥാനം നല്‍കാമെന്ന വാഗ്ദാനവുമായി കോണ്‍ഗ്രസ്. ഇന്നലെ രാത്രിയോടെ മുംബൈയിലെത്തിയ എം.എല്‍.എമാരെ കോണ്‍ഗ്രസ്-ജെ.ഡി.എസ് നേതാക്കള്‍ സന്ദര്‍ശിച്ച് അനുനയ ചര്‍ച്ചകള്‍ തുടരുകയാണ്. ബി.ജെ.പി എം.പി രാജീവ് ചന്ദ്രശേഖറിന്റെ വിമാനത്തിലാണ് വിമത എം.എല്‍.എമാരെ മുംബൈയിലെത്തിച്ചത്.

ഏത് വിധേനയും വിമതരെ കൂടെ നിര്‍ത്തുക എന്ന കാര്യം മാത്രമാണ് ഇപ്പോള്‍ നേതാക്കള്‍ ലക്ഷ്യമിടുന്നത്. നിലവിലെ മന്ത്രിമാരെ രാജിവെപ്പിച്ച് പുതുതായി ആറ് പേര്‍ക്ക് മന്ത്രി സ്ഥാനം നല്‍കാമെന്നാണ് കോണ്‍ഗ്രസ് മുന്നോട്ട് വച്ചത്. അതേസമയം കോണ്‍ഗ്രസിനുള്ളില്‍ തന്നെ നേതാവ് സിദ്ധരാമയ്യക്കെതിരായും അനുകൂലമായും പുതിയ ചര്‍ച്ചകള്‍ ഉയര്‍ന്നുവരുന്നതും കോണ്‍ഗ്രസിന് തലവേദനയാകുന്നുണ്ട്.

സിദ്ധരാമയ്യ, ജി. പരമേശ്വര, കെ.സി വേണുഗോപാല്‍, ഡി.കെ ശിവകുമാര്‍ എന്നിവരാണ് തിരക്കിട്ട ചര്‍ച്ചകള്‍ക്ക് നേതൃത്വം നല്‍കുന്നത്. യു.എസില്‍ നിന്നും തിരിച്ചെത്തിയ മുഖ്യമന്ത്രി എച്ച്.ഡി കുമാരസ്വാമിയും വൈകാതെ ഇവിടെയെത്തുമെന്നാണ് ലഭിക്കുന്ന വിവരം. അതിനിടെ ജെ.ഡി.എസ് നേതാവ് ദേവഗൗഡ ജെ.ഡി.എസ്-കോണ്‍ഗ്രസ് നേതാക്കളുമായി ചര്‍ച്ച നടത്തി.ഇതിനിടെ കോണ്‍ഗ്രസ് എം.എല്‍.എ പ്രതാപ ഗൗഡ പാട്ടീല്‍ ബി.ജെ.പിയില്‍ ചേരുമെന്ന് പരസ്യമായി പ്രഖ്യാപിച്ചു.