ലഖ്‌നൗ: പരീക്ഷയില്‍ കൃത്രിമം കാണിക്കുന്നത് തടയാന്‍ ലക്ഷ്യമിട്ട് യു.പിയില്‍ പ്രവേശന പരീക്ഷകള്‍ക്ക് ആധാര്‍ കാര്‍ഡ് നിര്‍ബന്ധമാക്കാന്‍ സര്‍ക്കാര്‍ ഒരുങ്ങുന്നു.
യു.പി മുഖ്യമന്ത്രി യോഗി ആദിത്യനാഥാണ് ഇക്കാര്യം വ്യക്തമാക്കിയത്. സെക്കന്‍ഡറി തലത്തിലുള്ള പരീക്ഷകള്‍ക്ക് ആധാര്‍ നിര്‍ബന്ധമാക്കുന്നതിനുള്ള നടപടി യു.പി സര്‍ക്കാരിന്റെ ബോര്‍ഡ് ഓഫ് സെക്കന്‍ഡറി എജ്യുക്കേഷനാ(യു.പി.ബി.എസ്.ഇ)ണ് കൈക്കൊള്ളുക. 2018ലെ പരീക്ഷകള്‍ക്ക് ഹാജരാവുന്ന വിദ്യാര്‍ഥികള്‍ ആധാര്‍ കാര്‍ഡുകളുമായി വേണം പരീക്ഷാ ഹാളിലേക്ക് എത്താന്‍.
ആള്‍മാറാട്ടം, രജിസ്‌ട്രേഷനുമായി ബന്ധപ്പെട്ട് നടത്തുന്ന കൃത്രിമങ്ങള്‍ എന്നിവ ഇതുവഴി തടയാന്‍ സാധിക്കുമെന്നാണ് യു.പി.ബി.എസ്.ഇ. കണക്കുകൂട്ടുന്നത്. ആധാര്‍ നിര്‍ബന്ധമാക്കുന്നതിലൂടെ ഓരോ വിദ്യാര്‍ഥിയുടെയും കൃത്യമായ വിവരം സെക്കന്‍ഡറി ബോര്‍ഡിന് ലഭിക്കുമെന്നാണ് പ്രതീക്ഷിക്കുന്നതെന്ന് യു.പി.ബി.എസ്.ഇ. സെക്രട്ടറി ഷയില്‍ യാദവ് അഭിപ്രായപ്പെട്ടു.
ഒന്‍പത്, 11 ക്ലാസുകളിലേക്കുള്ള വ്യാജ രജിസ്‌ട്രേഷന്‍ തടയുന്നതിനൊപ്പം 10, 12 ക്ലാസുകളിലേക്കുള്ള സംശയാസ്പദമായ അപേക്ഷകള്‍ തടയാനും ഇതിലൂടെ കഴിയുമെന്നാണ് സര്‍ക്കാര്‍ കരുതുന്നത്. ഓണ്‍ലൈനായി സ്വീകരിക്കുന്ന അപേക്ഷകളില്‍ ആധാറിലെ വിവരങ്ങള്‍ ചേര്‍ക്കാന്‍ യു.പി.ബി.എസ്.ഇ. ജില്ലാ ഇന്‍സ്‌പെക്ടര്‍ ഓഫ് സ്‌കൂള്‍സി(ഡി.ഐ.ഒ.എസ്)നോട് ആവശ്യപ്പെട്ടിട്ടുണ്ടെന്ന് അദ്ദേഹം പറഞ്ഞു.