ന്യൂഡല്‍ഹി: വിവാദമായ കല്‍ക്കരിപ്പാടം അഴിമതിയുമായി ബന്ധപ്പെട്ട കേസില്‍ പ്രമുഖ വ്യവസായിയും കോണ്‍ഗ്രസ് മുന്‍ എം.പിയുമായ നവീന്‍ ജിന്‍ഡാലിന് സി.ബിഐ കോടതി നോട്ടിസയച്ചു.
മധ്യപ്രദേശില്‍ കല്‍ക്കരിപ്പാടം അനുവദിച്ചതുമായി ബന്ധപ്പെട്ട കേസില്‍ നേരിട്ട് ഹാജരാകണമെന്നാവശ്യപ്പെട്ടാണ് കോടതി നോട്ടിസയച്ചത്.
നവീന്‍ ജിന്‍ഡാലിനെ കൂടാതെ ജിന്‍ഡാല്‍ സ്റ്റീല്‍ ആന്റ് പവര്‍ ലിമിറ്റഡ് മേധാവി, മുന്‍ ഡയരക്ടര്‍ സുശീല്‍ മാറു, മുന്‍ ഡപ്യൂട്ടി എം.ഡി ആനന്ദ് ഗോയല്‍, സി.ഇ.ഒ വിക്രാന്ത് ഗുജ്‌റാള്‍ എന്നിവരോടും ഹാജരാകാന്‍ ആവശ്യപ്പെട്ടിട്ടുണ്ട്. ഉര്‍ത്താന്‍ നോര്‍ത്ത് കല്‍ക്കരിപ്പാടം അനുവദിച്ചതില്‍ ഗൂഢാലോചന നടന്നുവെന്ന കേസിലാണ് സി.ബി.ഐയുടെ നടപടി.
വരുന്ന സപ്തംബര്‍ നാലിന് പ്രതികള്‍ ജഡ്ജി ഭരത് പ്രഷാര്‍ മുമ്പാകെ ഹാജരാകണം. കല്‍ക്കരി മന്ത്രാലയത്തെ തെറ്റിദ്ധരിപ്പിച്ചാണ് ജിന്‍ഡാല്‍ സ്റ്റീല്‍ ആന്റ് പവര്‍ ലിമിറ്റഡ് ഖനനാനുമതി നേടിയതെന്ന് സിബി.ഐ കുറ്റപത്രത്തില്‍ ആരോപിക്കുന്നു. ജാര്‍ഖണ്ഡിലെ കല്‍ക്കരിപ്പാടം സംബന്ധിച്ച കേസിലും ജിന്‍ഡാല്‍ പ്രതിയാണ്. ഈ കേസില്‍ വിചാരണ നടന്നുവരികയാണ്.
മധ്യപ്രദേശില്‍ മറ്റു രണ്ട് കല്‍ക്കരിപ്പാടങ്ങള്‍ അനുവദിച്ചതുമായി ബന്ധപ്പെട്ട കേസില്‍ മുന്‍ കല്‍ക്കരി സെക്രട്ടറി എച്ച്.സി ഗുപ്തയുള്‍പ്പടെ മൂന്ന് ഉന്നത ഉദ്യോഗസ്ഥരെ ഇതേ കോടതി കഴിഞ്ഞദിവസം രണ്ടു വര്‍ഷം തടവിനും ഓരോ ലക്ഷം വീതം പിഴയടക്കാനും ശിക്ഷിച്ചിരുന്നു.